ފަހު ވަގުތު ސާމިން ޖެހި ލަނޑާއެކު އެމްޓީސީސީ ފައިނަލަށް، ނުކުންނާނީ ކޭޕީއާރުސީއާ ދެކޮޅަށް

މިހާރު ކުރިއަށްދާ ޒިގްޒެގް އިންޓަރ އޮފީސް ފުޓްސަލް މުބާރާތުގެ ސެމީ ފައިނަލުގެ ފުރަތަމަ މެޗުގައި ރޭ ތަރިން ހިމެނޭ ތަޖުރިބާކާރު އާރްއާރުސީ ބަލިކުރުމަށްފަހު ކުޅުދުއްފުށީ ޕޯޓް ރެކްރިއޭޝަން ކުލަބް ފައިނަލުގެ ފުރަތަމަ ޖާގަ ރޭ ހޯދިއިރު ދެވަނަ ސެމީގައި ސީކޭއާރުއެޗް ބަލިކޮށް އެމްޓީސީސީ ފައިނަލަށް ދަތުރުކޮށްފި އެވެ.

ސެމީގެ ފުރަތަމަ މެޗުގައި ތަޖުރިބާކާރު ގިނަ ފުޓްސަލް ތަރިންތަކެއް ހިމެނޭ އާރުއާރުސީގެ މައްޗަށް ކޭޕީއާރުސީން 3 - 1 ގެ ނަތީޖާއަކުން ކުރިހޯދައިފި އެވެ. ކޭޕީއާރުސީގެ ޓީމުގައި ވެސް ފުޓްސަލްގެ އެންމެ ފުންނާބު އުސް ކުޅުންތެރިން ހިމެނެ އެވެ. މިމެޗުގައި ދެޓީމުގެ ފަރާތުން ވެސް ތަފާތު މޮޅު ކުޅުމެއް ފެނިގެންގޮސްފައިވެ އެވެ.

ކޭޕީއާރުސީގެ ލަނޑުތައް އެޓީމަށް ޖަހައިދިނީ އިބްރާހިމް ޝަނޫން ދެލަނޑު އަދި އަބްދުﷲ ޝާފިއު (ޝާއްޕެ) އެވެ. މިމެޗުގައި ޝާއްޕެގެ ފަރާތުން މޮޅު ކުޅުމެއް ފެނިގެންގޮސްފައިވާއިރު ކޭޕީއާރުސީ ސެމީއަށް ގެންގޮސްދިނުމުގައި ޝާއްޕެގެ މުހިންމު ރޯލެއް ފެނިގެންދިޔަ އެވެ. މެޗުގެ އެންމެ މޮޅު ކުޅުންތެރިޔާގެ މަގާމުވެސް މިމެޗުގައި ހޯދާފައިވަނީ އަބްދުﷲ ޝާފިއު (ޝާއްޕެ) އެވެ.

އާރުއާރުސީން ކާމިޔާބުކުރި ހަމައެކަނި ލަނޑަކީ އެޓީމުގެ ޖޯޒީ ނަމްބަރު 9 އިސްމާއިލް މުނީޒް ކާމިޔާބުކުރި ލަނޑެކެވެ. މެޗުގެ ދިހަ ވަނަ މިނެޓުގައި މިލަނޑު މުނީޒް އާރުއާރުސީއަށް ޖަހައިދިންއިރު މިއީ މެޗުގެ ފުރަތަމަ ލަނޑުކަން ވެސް ފާހަގަކޮށްލެވެ އެވެ. އެހެންނަމަވެސް މެޗުގައި ކޭޕީއާރުސީން ވަނީ ފަހަތުން އަރާ 3 ލަނޑު ޖަހައިގެން މެޗު ކާމިޔާބުކޮށްފަ އެވެ. މެޗުގައި އާރުއާރުސީގެ އިބްރާހިމް ސިނާހް (ސިނާ) އަދި ހުސެއިން ގައްސާން ލަބީބް (ހުސީ) އަށް ވަނީ ރެފްރީ ވަނީ ރީނދޫ ކާޑު ވެސް ދައްކާފަ އެވެ.

ސެމީ ފައިނަލުގެ ދެވަނަ މެޗުގައި ރޭ ކުލަބް އެމްޓީސީސީއާއި ސީކޭއާރުއެޗް ބައްދަލުކުރި މެޗުގައި ފަހު ވަގުތު ސާމިން ކާމިޔާބުކޮށްދިން ލަނޑާއެކު ކޭއާރުއެޗް ކަޓުވާލާ ފައިނަލުގެ ފަހު ޖާގަ އެމްޓީސީސީން ހޯދައިފި އެވެ. ރޭގެ މެޗު އެމްޓީސީސީން ކާމިޔާބުކުރީ 2 - 1 ގެ ހަނި ތަފާތަކުންނެވެ.

ރާއްޖޭގެ އެންމެ މޮޅު ފުޓްސަލް ކުޅުންތެރިންގެ ތެރޭގައި ހިމެނޭ އިސްމާއިލް ވަޖީހް، އަލީ ޝިޔާހު، އަޔާޒް އަހްމަދު އަދި ސާމިން މުހައްމަދު ނަސީރު، ޖުމައިލް ޖަމީލް އެކުލެވޭ އެމްޓީސީސީގެ ޓީމާ ދެކޮޅަށް ކުލަބް ކޭއާރުއެޗުން މިމެޗުގައި ވަނީ މޮޅު ކުޅުމެއް ދައްކާ އެމްޓީސީސީގެ ހަމަލާތައް ހުއްޓުވާފަ އެވެ.

މިމެޗުގައި ފުރަތަމަ ލަނޑުޖަހާ ލީޑުނެގީ ސާމިންގެ އެސިސްޓަކުން މުހައްމަދު އިސާމް (ޝަންޓޭ) އެވެ. އެއަށް ފަހު ފުރަތަމަ ހާފު ލަނޑެއް ނުފެނުނުއިރު ދެވަނަ ހާފުގެ މެދުތެރެއިން ކޭއާރުއެޗުގެ ބިދޭސީ ކުޅުންތެރިޔާ ކެނެޝްބެކޯވް ޒަނާރބެކް ވަނީ ބާރު ހަމަލާއެއް ގޯލުގެ ތެރެއަށް ފޮނުވާލައިގެން މެޗުގެ ނަތީޖާ ހަމަހަމަކޮށްދީފަ އެވެ.

ނަމަވެސް މެޗުގެ ނަތީޖާ އެނބުރުނީ އަޔާޒް އަހްމަދު ކުޅެން ނުކުމެ ދިން އެސިސްޓަކުން ބޯޅަ ގޯލުގެ ތެރެއަށް ވައްދާލައިގެން މެޗު ނިމެން މިނެޓަކަށްވެފައި ވަނިކޮށް ސާމިން ކާމިޔާބުކޮށްދިން ލަނޑާއެކު އެވެ. މިމެޗު މޮޅު ކުޅުންތެރިޔާގެ މަގާމު ހޯދީ އެމްޓީސީސީގެ ޖާޒީ ނަމްބަރު 17 އަލީ ޝިޔާހު (ޝިޔާ) އެވެ.

މިމުބާރާތުގެ ފައިނަލުގައި އަންނަ އާދިއްތަ ދުވަހުގެ ހަވީރު އެމްޓީސީސީން ނުކުންނާނީ ކޭޕީއާރުސީއާ ދެކޮޅަށެވެ. ބެލެވޭގޮތުގައި މިމެޗު ވެގެންދާނީ ސަޕޯޓަރުން ބަލާހިތްވާކަހަލަ ފޯރިގަދަ ފައިނަލަކަށެވެ. ފައިނަލް މެޗު އޮންނާނީ އާދިއްތަދުވަހުގެ ރޭ 8:30 ގައި ކުޅުދުއްފުށީ ޒޯން ސްޓޭޑިއަމްގެ ޓާފް ދަނޑުގަ އެވެ.