ރަށު ތެރޭގައި އެކިގޮތްގޮތަށް ވާހަކަ ދެކެވޭތާ ދުވަސްތަކަކަށްފަހު މޭޔަރު މުޙައްމަދު ޢާޠިފް މޯލްޑިވިއަން ޑިމޮކްރެޓިކް ޕާޓީގެ ޓިކެޓްގައި ދެވަނަ ދައުރަކަށް ކުޅުދުއްފުށި ސިޓީގެ މޭޔަރުކަމަށް ކުރިމަތި ލައްވާކަން މިދިޔަ ބުރާސްފަތި ދުވަހު މޭޔަރުގެ ފޭސްބުކް ޕޭޖަށް ދޫކޮށްލެއްވި ވީޑިއޯއަކުން ވަނީ ހާމަކުރައްވާފައެވެ. މިވީޑިއޯ މިހާތަނަށް އަށްޑިހަހަތަރުހާހަށްވުރެ ގިނަ ފަހަރު މީހުން ބާލާފާވާއިރު، ޤައުމީ ފެންވަރުގެ ނޫސްތަކުގެ ފަލަ ސުރުހީތަކުންވެސް މި ވީޑިއޯ ވަނީ ޖާގަ ހޯދާފައެވެ. މި ވީޑިއޯގައި މޭޔަރު ރައްޔިތުންނާއި ކުރިމަތިކުރުވި ސުވާލުތަކުގެ ވާހަކައާއި، މޭޔަރު އަދިވެސް ރައްޔިތުންނާއިއެކު، ރައްޔިތުން އެދޭގޮތަށް ރަށުގެ ތަރައްޤީގެ ކަންކަން ރާވާ ހިންގެވުމުގައި ދެމިހުންނަވާނެ ކަމުގެ ވާހަކައެވެ. ނަމަވެސް އެއަށްވުރެ ފުނަށް ވިސްނާލައިފިނަމަ، 01 މިނެޓާއި 33 ސުކުންތުގެ މިވީޑިއޯކޮޅުން އަދިވެސް އެތަކެއް ވާހަކަތަކެއް މޭޔަރު ވިދާޅުވާހެން އަޅުގަނޑަށް ހީވާތީ އެވާހަކަތައް ހިއްސާކޮށްލާނަމަވެ.
ފުރަތަމަ ކަމަކަށް 'ދަ ވީޑިއޯ އިޓްސެލްފް' އެވެ. ކޮންމެވެސް ސިފައެއްގައި އެބޭފުޅަކު ނިސްބަތްވާ ޕާޓީއެއްގެ ކުލަ ޓައްޕަކަށް އަމިއްލަ ފޮޓޯ ގަންބާލައިގެން ނުވަތަ ތާނައިން ލިޔެލާ ސްޓޭޓަސްއަކުން ކެނޑިޓޭޓުން ކުރިއަށްއޮތް އިންތިހާބުގައި ވާދަކުރާކަން އިޢުލާންކޮށްކޮށް ތިއްބާ، ކުޅުދުއްފުށި ސިޓީގެ މޭޔަރުގެ މިވީޑިއޯއިން ސާބިތުކޮށްދެއްވީ ރަށުގެ ތަރައްޤީގެ ކަންކަމުގައިވެސް އެމަނިކުފާނު ގެންގުޅުއްވާ ތަފާތު، އިޖާދީ، ޒަމާނީ ވިސްނުންފުޅެވެ. ޓިކްޓޮކާއެކު މީހުންގެ ސަމާލުކަންދިނުމާއި (އެޓެންޝަން ސްޕޭން) މަޢުލޫމާތު ދެނެގަތުމާއި ހަނދާންކުރުމުގެ (އިންފޮމޭޝަން ރިޓެންޝަން) ޤާބިލުކަމަށް ބޮޑެތި ބަދަލުތަކެއް އައިސްފައިވާ މި ޒަމާނުގައި، އެންމެ ގިނަބަޔަކަށް އެންމެ ފަސޭހައިން، އެންމެ ސާދާކޮށް މޭޔަރު ދެއްވަން ބޭނުންފުޅުވި މެސެޖާއި، ދައްކަވަން ބޭނުންފުޅުވީ މަންޒަރުތައް ދައްކާލެވޭނެ ގޮތަކީ ކޮބައިކަން އެމަނިކުފާނަށް ވަރަށް ސާފެވެ. އެމަނިކުފާނަކީ މީސްމީޑިޔާއަށް ފަރިތަ، އެހެންބޭފުޅުންނާ ތަފާތުކޮށް ކަންކަންކުރައްވަން ދަންނަ އަދި ކެރޭ ބޭފުޅެކޭ ވިދާޅުވާ ކަހަލައެވެ.
ދެވަނަކަމަކަށް، މޭޔަރު ތުރުކުރައްވައިގެން އިންނެވި ރީނދޫކުލައިގެ ޓައީއެވެ. ރީނދޫ ކުލައިގެ ޓައީއެއް އަޅައިގެން ހުރި ދިވެހި ފިރިހެނަކު ފެނިއްޖެނަމަ އޭނާ ދާން ތައްޔާރުވެގެން އެހުރީ ކޮންތަނަކައްކަމެއް ނުވަތަ އޭނާ އަދާކުރަނީ ކޮންވަޒީފާއެއް ކަމެއް މީހަކަށް ނޭނގިދާނެއެވެ. ނަމަވެސް އޭނާ ނިސްބަތްވަނީ އެމް.ޑީ.ޕީއަށްކަން ދާދި ކަށަވަރުވާނެއެވެ. މޭޔަރުގެ ޓައީ އިންވެސް ރަމްޒުކޮށްދެއްވަނީ އެމަނިކުފާނު ނިސްބަތްވާ ޕާޓީއެވެ. ނަމަވެސް އަޅުގަނޑަށް ޓައީ މުހިއްމުވެގެން މިއުޅެނީ އެޓައީ ފިޔަވާ އެވީޑިއޯއިން ރީނދޫކުލައިގެ އިތުރު އެއްވެސް އެއްޗެއް، އެއްވެސް ކުލަވަރެއް، އެއްވެސް ނިޝާނެއް ފެންނަން ނެތަތީއެވެ. އެންމެ ދެރަވެގެން ޕާޓީގެ ލޯގޯވެސް ފެނުނީ ކަޅުކުލައިންނެވެ. ހުރިހާ އެއްޗަކީ ޕާޓީ ނޫންކަމަށާއި، ޕާޓީގެ ވިސްނުމަށްވުރެ އަމިއްލަ ވިސްނުންފުޅު އިސްކުރައްވާނެކަމަށާއި، ޕާޓީގެ މަސްލަހަތަށްވުރެ ރަށާއި ރައްޔިތުންގެ މަސްލަހަތު އިސްކުރައްވާނެކަމަށާއި، ކޮންމެ ޕާޓީއެއްގައި ހުންނެވިއެއްކަމަކު، ހައްޤުގޮތް އިޚްތިޔާރު ކުރައްވާނެކަމަށާއި، ޕަޕެޓް މާސްޓަރެއްގެ ޕަޕެޓެއް ފަދައިން އެމަނިކުފާނު ކޮންޓްރޯލް ނުކުރެއްވޭނޭ ވިދާޅުވާ ކަހަލައެވެ.
ތިންވަނަކަމަކަށް އެވީޑިއޯގައި މޭޔަރު އެންމެ ހަރު އަޑުން އެންމެ ސާބިތުކަމާއިއެކު ވިދާޅުވި ލަފްޒެވެ. މޭޔަރު ވީޑިއޯގައި ކުރިމަތި ކުރާ ސުވާލުތަކުގެ ޖަވާބުގައި ވަރަށް ސާފުކޮށް، އެއްވެސް ޖެހިލުންވުމެއްނެތި، ހިނިތުންވުމާއިއެކު 02 ފަހަރަށް ނޫނެކޭ ވިދާޅުވެއެއެވެ. އަދި އަޅުގަނޑުމެން އެގޮތަކަށް ނުރުހޭނަމޭ ވިދާޅުވެއެވެ. ފުރަތަމަ "ނޫން" އިން ކުޅުދުއްފުށީ ރައްޔިތުންނަކީ ރަށުގައި މިހާރު އޮތް ޒަމާނީ އިދާރީ ހިންގުން ނިމުމަކަށް ގެނައުމަށާއި، މަރުކަޒީ ވިސްނުމުގެ މީހުން ކައުންސިލްގެ ގޮނޑިތަކަށް ހޮވުމަށާއި، ސަރުކާރުން ކުޅުދުއްފުށީގެ ތަރައްޤީ ހުއްޓުވާލާފައި އޮތްއޮތުމަށް ތާއިދުކުރުމަށާއި، ރައްޔިތުންގެ އަތުގައި މިހާރު އޮތް ބާރު ސަރުކާރަށް ދޫކޮށްލުމަށާއި އަދި ވަޒީފާއާއި ނުފޫޒުގެ ކުރިމަތީގައި ކޫޑަކަކޫ ޖެހުމަށް ރުހޭނެ ބައެއް ނޫންކަން ހާމަކުރައްވާ ކަހަލައެވެ. އަދި ދެވަނަ "ނޫން" އިން އަމިއްލަފުޅަށްވެސް އެކަންކަމަށް އިންކާރުކުރައްވައެވެ. އަމިއްލަފުޅަށްވެސް ނުފޫޒުގެ ކުރިމަތީގައި ކުޑަކަކޫ ޖައްސަވަން ދެކޮޅު ހައްދަވާ، ލާމަރުކަޒީ ނިޒާމުގެ ދިފާއުގައި ތެދުވެވަޑައިގެން ހުންނެވީމޭ ވިދާޅުވާ ކަހަލައެވެ.
އޭގެ އިތުރުން އަޅުގަނޑަށް މި ވީޑިއޯއިން އެންމެ ފާހަގަކުރެވުނީ ފަނޑުކުލައެއްގެ ރަސްމީ ހެދުމެއްގައި ތިބޭ ގޮތްނޭނގޭ ބައެކެވެ. އެމީހުންގެ ފުރަތަމަ ފެނިލުމުން އެއީ މަރުކަޒީ ސަރުކާރުން، ނުވަތަ ސީދާ ރައީސް އޮފީހުން އަންގާ އެންގުންތަކަކަށް ތަބާވާ ބައެއްކަމަށް ދޭހަވެއެވެ. އަދި ދެވަނަ ފެނިލުމުން އެއީ ފައިސާ އިތުރުވާ ވަރަކަށް އަދަދުގެ ގޮތުން ގިނަވާ ބައެއްކަމަށް ދޭހަވެއެވެ. އަޅުގަނޑަށް ފެންނަތަނުގައި، އެއީ ދަޢުލަތުގެ މާލިއްޔަތުން ބޮޑު މުސާރަ ނަންގަވައިގެން ސިޔާސީ މަޤާމުތަކުގައި ތިއްބަވާ، ސަރުކާރުގެ ސިޔާސީ އެޖެންޑާ ކުރިއެރުވުމުގެ މަސައްކަތާ ހަވާލުވެގެން ތިއްބަވާ ބޭފުޅުންނެވެ. ރައްޔިތުންނަކީ ހުށަހެޅޭ އެފަދަ ހުށަހެޅުންތަކުގެ ކުރިމަތީގައި ކޫޑަކަކޫޖަހާ، އަމިއްލަ މިނިވަންކަމާއި، އަމިއްލަ ވިސްނުމާއި، އަމިއްލަ ބާރުވެރިކަން ވިއްކާލާ ބަޔަކަށް ނުވާށޭ ވިދާޅުވާ ކަހަލައެވެ.
އަދި މިނޫނަސް އެތައް ފޮޓޯތަކަކާއި މަންޒަރުތަކަކުން ކުޅުދުއްފުށީގައި ހުއްޓިފައިހުރި މަޝްރޫޢުތަކުގެ ވާހަކައާއި، މޭޔަރުގެ މޭސްތިރިކަމުގައި ކުޅުދުއްފުށްޓަށް ގެނެސްދެއްވާފައިވާ ތަރައްޤީ ދައްކަވައިދެއްވައިފިއެވެ. އަދި އަޅުގަނޑަށް ލިޔުމަށް ތިރިކުރަން ނޭނގޭ އަދި އަޅުގަނޑަށް ވިސްނައިގަންނަންވެސް ނޭނގޭ އެތައް ވާހަކަތަކެއް މި ވީޑިއޯގެ ޒަރިއްޔާއިން މޭޔަރު ބުނެދެއްވާހެން އަޅުގަނޑަށް ހީވެއެވެ. ނަމަވެސް މިއީ ހަމަ ކުށްހީއަކަށްވެސް ވެދާނެއެވެ. ކޮންމެއަކަސް، މޭޔަރުގެ ކެމްޕޭނު ލޯންޗްކުރުމުގައި މިގެންގުޅުއްވި ވިސްނުންފުޅާއި ވައްޓަފާޅި ވަރަށް ތަފާތެވެ.
