އެސްޓީއޯއިން މަސައްކަތްތެރިންގެ ދުވަސް ފާހަގަކުރުމުގެ ގޮތުން ވަންޑޭކަޕެއް ބާއްވައިފި

ކުޅުދުއްފުށީގައި ހުންނަ އެސްޓީއޯ ރީޖަނަލް ސެންޓަރުން މަސައްކަތްތެރިންގެ ދުވަސް ފާހަގަ ކުރުމަށާއި މުވައްޒަފުންގެ މެދުގައި އެކުވެރިކަން ބަދަހި ކުރުމުގެ ގޮތުން ވަންޑޭ ފުޓުބޯޅަ މުބާރާތެއް އިއްޔެ ބާއްވައިފި އެވެ.

އެސްޓީއޯ ފާމަސީއާއި އެސްޓީއޯ ނޯތު ޑީސީގެ ސްޓާފުން 4 ގުރޫޕަކަށް ބަހާލައިގެން ކުރިއަށްގެންދިޔަ މި ކަޕް ފަށާފައިވަނީ އިއްޔެ ހަވީރު 4 ޖެހިއިރުއެވެ.

ފިލިޕްސް، ކުރުގާ، ނިޕޮން އަދި މަކިޓާ ގެ ނަމުގައި ޓީމުތައް ބައިވެރިވި މި ކަޕްގައި ކޮންމެ ޓީމެއްގައި ހިމެނުނީ 4 ކުޅުންތެރިންނެވެ. ކޮންމެ ޓީމެއް ކޮންމެ ޓީމަކާއި ބައްދަލުކޮށް މޮޅުވާ 2 ޓީމެއް ފައިނަލަށް ދާގޮތަށް ކުޅުނު މި މެޗް ކުރިއަށް ގެންގޮސްފައިވަނީ ހާފެއްގައި 5 މިނެޓު ކުޅޭގޮތަށެވެ.

މި މުބާރާތުގެ ފައިނަލުގައި ކުރުގާ އާއި ނިޕޮން ބައްދަލުކޮށް ކުރުގާ ކާމިޔާބު ކުރީ ޕެނަލްޓީ ޖަހައިގެން 2 ލަނޑު 1 ލަނޑުންނެވެ. ފައިނަލް މެޗްގެ މޮޅު ކުޅުންތެރިއަކަށް ހޮވިފައިވަނީ ކުރުގާގެ އަބްދުﷲ ނަޖީބެވެ. އަދި ކަޕްގައި 5 ލަނޑު ޖަހައިގެން އެންމެ ގިނަ ލަނޑު ޖެހި ކުޅުންތެރިއަކަށް ހޮވިފައިވަނީ ނިޕޮން ޓީމުގެ ހަސަން މުހައްމަދެވެ.