ކުޅުދުއްފުށީގައި ޖޫން މަހު ބާއްވާ އިންޓަރ އެޓޯލް އެތުލެޓިކްސް މީޓުގައި 13 ސްކޫލަކުން ބައިވެރިވެއްޖެ

ކުޅުދުއްފުށީގައި މިފެށޭ ޖޫން މަހު 10 ގައި ބޭއްވުމަށް ހަމަޖެހިފައިވާ 18 ވަނަ އެޓޯލް އިންޓަރ ސްކޫލު އެތުލެޓިކްސް މީޓުގައި 13 ސްކޫލަކުން 53 ޓީމު ބައިވެރިވާނެކަމަށް އެތުލެޓިކްސް އެސޯސިއޭޝަނުން ހާމަކޮށްފި އެވެ.

އެ އެސޯސިއޭޝަނުން އާއްމު ކުރި ލިސްޓުގައިވާ ގޮތުން މިމުބާރާތުގައި ބައިވެރިވާ ސްކޫލް ތަކަކީ ހދ ކުޅުދުއްފުށީ ޖަލާލުއްދީން ސްކޫލާއި، އަފީފުއްދީން ސްކޫލާއި، ހދ އަތޮޅު ތައުލީމީ މަރުކަޒާއި، ހދ ކުރިނބީ ސްކޫލާއި، ނޮޅިވަރަމް ސްކޫލާއި، ނޮޅިވަރަންފަރު ސްކޫލާއި އަދި ހދ އަތޮޅު މަދަރުސާއެވެ. މީގެ އިތުރުން މާލޭ ސިޓީން 5 ސްކޫލެއް ބައިވެރި ވެފައިވެއެވެ. އެއީ ބިލަބޮންގ ހައި އިންޓަރނޭޝަނަލް ސްކޫލާއި، ކަލާފާނު ސްކޫލު އަދި ތާޖުއްދީން ސްކޫލްގެ އިތުރުން އިސްކަންދަރު ސްކޫލާއި ދަރުމަވަންތަ ސްކޫލެވެ. އައްޑޫ ސިޓީ ބައިވެރިވެފައިވަނީ ހަމައެނި ޝަރަފުއްދީން ސްކޫލެވެ.

4 އުމުރު ފުރާއަކަށް ބަހާލައިގެން ކުރިއަށް ގެންދިއުމަށް ހަމަޖެހިފައިވާ މިމުބާރާތް ކުރިއަށްދަނީ 2 ޖިންސް ގެ ދަރިވަރުން ވަކިންނެވެ. މިމުބާރާތުގައި ކުރިޔަށްދާ އުމުރު ފުރާ ތަކަކީ 11 އަހަރުން ދަށް، 13 އަހަރުން ދަށް، 15 އަހަރުން ދަށް އަދި 17 އަހަރުން ދަށެވެ.

މިމުބާރާތް ވީހާވެސް ކުލަގަދަ ކޮށް ގެންދިއުމަށްޓަކައި ކުޅުދުއްފުށީ ކައުންސިލާއި ކުޅުދުއްފުށީ ޕޮލިހާއި އެމްއެންޑީއެފްގެ އިތުރުން ސްކޫލުތައް އަދި ކުޅުދުއްފުށީގެ އާންމު ރައްޔިތުން ދަނީ ވަރަށް ބޮޑަށް ތައްޔާރު ވަމުންނެވެ.