ޒިގްޒެގް އިންޓަރ އޮފީސް ފުޓުސަލް މުބާރާތް ނޮވެމްބަރުގައި ބާއްވަން ނިންމައިފި

ކޮންމެ އަހަރަކުވެސް ބާއްވަމުން އަންނަ ޒިގްޒެގް އިންޓަރ އޮފީސް ފުޓުސަލް މުބާރާތް އަންނަ ނޮވެމްބަރުގައި ބާއްވާ ގޮތަށް ހަމަޖައްސައިފި އެވެ.

އެހެން އަހަރުތަކެކޭވެސް އެއްގޮތަށް ކުޅުދުއްފުށީގައި ހުންނަ ސަރުކާރު އޮފީސްތަކަށާއި ސަރުކާރު ހިއްސާވާ ކުންފުނިތަކަށް ހުޅުވާލައިގެން ބާއްވާ މި މުބާރާތުގެ ބައިވެރިވުމުގެ ފުރުސަތު މިހާރު ވަނީ ހުޅުވާލާފައެވެ. ނޮވެމްބަރު މަހުގެ ތިނެއްގައި ބޭއްވުމަށް ނިންމާފައިވާ މި މުބާރާތުގައި ބައިވެރިވުމަށް މި ހިނގާ އޮކްޓޯބަރު މަހުގެ 10 ވަނަ ދުވަހުގެ ކުރިން ކުޅުދުއްފުށީ “ވިޝުއަލް އިމޭޖް” އަށް ފޯމު ހުށަހަޅަން ޖެހޭނެ ކަމަށް ޒިގްޒެގުން ހާމަކުރެއެވެ.

މުބާރާތުގައި ބައިވެރިވުމަށް އެދި ހުށަހަޅާ ފޯމް ވިޝުއަލް އިމޭޖް ސްޓޯޑިއޯއިން ލިބެން ހުންނާނެ ކަމަށާއި ޒިގްޒެގްގެ ފޭސްބުކު ޕޭޖުން ފެންނަން ހުންނާނެ ކަމަށްވެސް އެ ޖަމިއްޔާއިން ބުނެއެވެ.

މުބާރާތުގައި ބައިވެރިވުމަށް އެދި ހުށަހަޅާ ކޮންމެ ޓީމަކުންވެސް ފޯމާއެކު 1000 ރުފިޔާ ދައްކަންޖެހޭނެ ކަމަށް ޒިގްޒެގުން ހާމަކުރެއެވެ.

މިދިޔަ އަހަރު ބޭއްވުނު ޒިގްޒެގް އިންޓަރ އޮފީސް ފުޓުސަލް މުބާރާތް ކާމިޔާބުކޮށްފައިވަނީ ކުޅުދުއްފުށީ ޕޮލިސް ޓީމެވެ. އަދި ރަނަރއަޕް ޓީމަކަށް ހޮވިފައިވަނީ އެމްއެންޑީއެފްގެ ޓީމެވެ.