ޒިގްޒެގް އިންޓަރ އޮފީސް ފުޓްސަލް މުބާރާތުގެ ގުރުއަތުލުން ރޭ ބާއްވައިފި

ޒިގްޒެގް ފޯރ ޔޫތް ލިންކޭޖްގެ ފަރާތުން ބޭއްވުމަށް ހަމަޖެހިފައިވާ ހަތަރު ވަނަ ޒިގްޒެގް އިންޓަރ އޮފީސް ފުޓްސަލް މުބާރާތުގެ ގުރުއަތުލުން ރޭ ބާއްވައިފި އެވެ.

3 ގްރޫޕަކަށް ބަހާލައިގެން ކުރިއަށް ގެންދިޔުމަށް ހަމަޖެހިފައިވާ މިމުބާރާތުގެ ގްރޫޕް 1 ގައި ހިމެނެނީއަފީފުއްދީން ސްކޫލާއި، ހދ. އަތޮޅު ތައުލީމީ މަރުކަޒުގެ އިތުރުން އެމްއާރުޑީސީ އާއި ޕޮލިސް ޓީމެވެ. ގުރޫޕު 2 ގައި ހިމެނެނީ އެސްޓީއޯ އާއި ކޭޕީއެލް އާއި އަތޮޅު ކައުންސިލުގެ އިތުރުން ދިރާގެވެ. އަދި ގުރޫޕު 3 ގައި ހިމެނެނީ އެމްއެންޑީއެފް އާއި ހޮސްޕިޓަލުގެ އިތުރުން ކަސްޓަމްސް އާއި ފަޔަރ އަދި އެމްޑަބްލިޔު އެސް ސީ އެވެ.

ކުރިން މިއަދު މުބާރާތް ފެށުމަށް ހަމަޖެހިފައި އޮތް ނަމަވެސް ނަސްރުގެ ދުވަހުގެ ހަރަކާތްތައް ކުޅުދުއްފުށީގައި ކުރިއަށް ދާތީވެ މި މުބާރާތް ފަށާނީ މާދަމާއެވެ.

މިމަހުގެ 29 ގެ ނިޔަލަށް ކުރިއަށްދާ މި މުބާރާތުގެ ފުރަތަމަ މެޗުގައި ބައްދަލުކުރާނީ ޕޮލިސް ޓީމާއި އޭއީސީގެ ޓީމެވެ. މިމެޗް އޮންނާނީ މާދަމާ ރޭ 8:30 ގައި ކުޅުދުއްފުށީ ޒޯން ސްޓޭޑިއަމްގައެވެ.

ކުޅުދުއްފުށީގައި ހުރި ސަރުކާރު އޮފީސް ތަކަށާއި ސަރުކާރު ހިއްސާވާ ކުންފުނިތަކަށް ހުޅުވާލައިގެން ބާއްވަމުން އަންނަ މި މުބާރާތުގެ އެންމެ ފަހުގެ ޗެމްޕިއަނަކީ ކުޅުދުއްފުށީ ޕޮލިސް ޓީމެވެ. އަދި ރަނަރއަޕް ޓީމަކަށް ހޮވިފައިވަނީ އެމްއެންޑީއެފްގެ ޓީމެވެ.