މެންޗެސްޓަރ ޔުނައިޓެޑުން އާސެނަލް ހުއްޓުވައިފި

އިންގްލިޝް ޕްރިމިއަރ ލީގް ސުޕަރ ސަންޑޭ ގައި މިވަގުތު ތާވަލުގެ އެއްވަނާގައި އޮތް އާސެނަލްއާއި އެންމެ ފަހުގެ ޗެމްޕިއަން މެންޗެސްޓަރ ޔުނައިޓެޑް ބައްދަލު ކުރި މެޗު 1-0 ގެ ނަތީޖާއިން މެންޗެސްޓަރ ޔުނައިޓެޑް މޮޅުވެއްޖެ އެވެ.

މެންޗެސްޓަރ ގެ އޮލްޑް ޓްރޮފޮޑް ގައި ކުޅެވުނު މި މެޗުގެ ހަމަ އެކަނި ގޯލް މެންޗެސްޓަރ ޔުނައިޓެޑްއަށް މެޗުގެ 27 ވަނަ މިނެޓްގައި ކާމިޔާބު ކޮށްދިނީ ވޭން ރޫނީ ނަގައިދިން ކޯނަރެއް ބޮލުން ގޯލުގެ ކަނަށް ފޮނުވާލައިގެން، 2012 ވަނަ އަހަރު އާސެނަލްއިން 24 މިލިއަން ޕައުންޑަށް ޔުނައިޓެޑްއަށް ބަދަލުވި ނެދަލެންޑްގެ ސްޓްރައިކަރ ރޮބިން ވެން ޕާސީ އެވެ.

ގޯލުޖެހުމަށްފަހު ވެންޕާސީ ވަނީ ފުރަތަމަ ފަހަރަށް އާސެނަލްގެ ސަޕޯޓަރުން ކުރިމަތީ އުފާ ފާޅުކޮށްފަ އެވެ.

ރޭގެ ގޯލަކީ މިދިޔަ ސީޒަންގަ 26 ގޯލް ޖަހައިން ޕްރިމިއަރ ލީގުގެ ރަންބޫޓް ހޯދި ވެން ޕާސީ މިސީޒަން ލީގުގައި ޖެހި 7 ވަނަ ގޯލެވެ. މި ގޯލާއެކު ވެން ޕާސީ ހިމެނެނީ ގޯލް ލިސްޓްގެ 2 ވަނާގައެވެ. ރޭގެ މެޗުގެ މޮޅު ކުޅުންތެރިއަކަށް ހޮވިފައިވަނީ ޔުނައިޓެޑްގެ ވޭން ރޫނީއެވެ.

މެޗުގެ ކުރިން ތާވަލްގެ 8 ވަނާގައި އޮތް ޔުނައިޓެޑް ރޭގެ މޮޅާއެކު 20 ޕޮއިންޓާއެކު ވަނީ ތާވަލުގެ 5 ވަނައަށް ކުރިއަށް ޖެހިލައި 1 ވަނާގައި އޮތް އާސެނަލްއާ 5 ޕޮއިންޓަށް ފަރަގު ކުޑަކޮށްފައެވެ.

ރޭގެ މެޗުތަކާއެކު ކޮންމެ ޓީމެއްވެސް 11 މެޗް ކުޅެފައިވާއިރު ތާވަލުގެ 1 ވަނާގައި 25 ޕޮއިންޓާއެކު އާސެނަލް އޮތްއިރު 2 ވަނާގައި ލިވަޕޫލް އޮތީ 23 ޕޮއިންޓާއެކުއެވެ. ތިންވަނާގައި 22 ޕޮއިންޓާއެކު  ސައުތްއެމްޕްސަން އޮތްއިރު، 21 ޕޮއިންޓާއިއެކު އޮތީ ޗެލްސީއެވެ.