ކުޅުދުއްފުށީ “ބޭލާ”އިން ބާއްވާ ފުރަތަމަ ފުޓްބޯޅަ މުބާރާތް ޑިސެމްބަރ ގައި ފަށަނީ

ކުޅުދުއްފުށީ “ބޭލާ” އިންތިޒާމް ކުރާ ފުރަތަމަ “ބޭލާ ކަޕް” އަންނަ ޑިސެމްބަރުގައި ފެށުމަށް އެންމެ ފަހުގެ ތައްޔާރީތައް ވަމުންދާ ކަމަށް ބޭލާއިން ހާމަކޮށްފި އެވެ

ބޭލާގެ މެނޭޖަރ އުމަރު ޔަހުޔާ މި ނޫހަށް މައުލޫމާތު ދެއްވަމުން ވިދާޅުވީ މިފަދަ އެހެން މުބާރާތްތަކާ ޚިލާފަށް މި ފުޓްބޯޅަ މުބާރާތުގައި ބައިވެރިވެވޭނީ ބޭލާއިން ދައުވަތު ދޭ ޓީމު ތަކަށް އެކަނި ކަމަށެވެ. އެގޮތުން ބޭލާއިން ދައުވަތު ދީގެން ކުޅުދުއްފުށީގެ 4 ޓީމަކާއި ނޮޅިވަރަމް ޓީމެއް އަދި ނެއްލައިދޫ ޓީމެއް ބައިވެރިވާނެ ކަމަށް އޭނާ ވިދާޅުވި އެވެ

އުމަރު ވިދާޅުވީ ޗެމްޕިއަން ޓީމަށް 10000ރ. ފައިސާގެ އިނާމެއް ދެވޭތޯ މަސައްކަތް ކުރަމުން އަންނަ ކަމަށެވެ.

“އަޅުގަނޑުމެން މިބަލަނީ ޗެމްޕިއަން ޓީމަށް 10000ރ. އަދި ރަނަރަޕް ޓީމަށް 6000ރ. ގެ ފައިސާގެ އިނާމެއް ދެވޭތޯ. އެހެންނަމަވެސް މުޅިން އަދި އެކަމެއް ފައިނަލެއް ނުވޭ” ބޭލާގެ މެނޭޖަރ ވިދާޅުވި އެވެ.

މުބާރާތަށް ތައްޔާރު ވުމުގެ ގޮތުން މިހާރު ކުރިއަށްދަނީ އެންމެ ފަހުގެ ތައްޔާރީތައް ކަމަށާއި ކަމާ ބެހޭ މުއައްސަސާތަކުން ވެސް އެއްބާރު ލުން ލިބޭކަމަށް އުމަރު ވިދާޅުވި އެވެ.

ޑިސެމްބަރ 14 އިން 27 އަށް ކުރިއަށް ގެންދިއުމަށް ހަމަޖެހިފައިވާ މިމުބާރާތުގާ ކުޅުދުއްފުށިން ބައިވެރިކޮށްފައިވަނީ ކޮރަލް އާއި ހިރަފުސް، ޒިގުޒެގް އަދި ޑުރިބަލް އެވެ.