ޗެލްސީ އަތުން ލިވަޕޫލް ބަލިވެ ޕްރިމިއާ ލީގުގެ ފޯރި ގަދަވެއްޖެ

ރޭ އިނގިރޭސި ޕްރިމިއާ ލީގުގައި ޗެލްސީ އަތުން 2-0 އިން ލިވަޕޫލް ބަލިވެ ލީގު ހޯދުމުގެ ރޭހުގެ ފޯރިގަދަ ވެއްޖެ އެވެ.

ރޭ ލިވަޕޫލްގެ އެންފީލްޑްގައި ކުޅުނު މެޗުގައި ޗެލްސީގެ ފުރަތަމަ ގޯލް އެ ޓީމަށް ކާމިޔާބު ކޮށްދިނީ ފުރަތަމަ ހާފުގެ އިތުރު ވަގުތުގެ 3 ވަނަ މިނެޓްގައި ޑެމްބަ ބާ އެވެ. އަދި ފަހު ހާފުގެ އިތުރު ވަގުތުގައި ވިލިއަން ވަނީ އިތުރު ލަނޑެއްޖަހާ 2-0 އިން ލިވަޕޫލް ބަލިކޮށް ލިވަޕޫލްއިން މޮޅުވަމުން އައި ރެކޯޑު ނިމުމަކަށް ގެނެސްފަ އެވެ.

މެންޗެސްޓަރ ސިޓީ ރޭ ރަށުން ބޭރުގައި ކުޅުނު މެޗުގައި ވަނީ 2-0 އިން ކްރިސްޓަލް ޕެލަސްގެ މައްޗަށް ކުރި ހޯދާފަ އެވެ. ރޭ ސިޓީގެ ފުރަތަމަ ގޯލް މެޗުގެ 4 ވަނަ މިނެޓްގައި ޔާޔާ ޓޫރޭ ގެ އެހީތެރި ކަމާއެކު ކާމިޔާބު ކުރީ އެޑިން ޒެކޯ އެވެ. އަދި އަނިޔާއަށް ފަހު އަލުން ކުޅުމާ ގުޅުނު ޔާޔާ ޓޫރޭ ވަނީ މެޗުގެ 43 ވަނަ މިނެޓްގައި އިތުރު ގޯލެއް ކާމިޔާބުކޮށް ލީގު ކާމިޔާބު ކުރުމުގެ އުއްމީދު  ބޮޑުކޮށްފަ އެވެ.

ލީގުގައި ލިވަޕޫލް އަދި ޗެލްސީއަށްވެސް ބާކީ ދެ މެޗް އޮތްއިރު އެއްވަނާގައި ލިވަޕޫލް އޮތީ 80 ޕޮއިންޓާއެކު އެވެ. ދެވަނާގައި ޗެލްސީ 78 ޕޮއިންޓާއެކު އޮތްއިރު މެންޗެސްޓަރ ސިޓީ 77 ޕޮއިންޓާއެކު އޮތީ ތާވަތަލުގެ 3 ވަނައިގަ އެވެ. ސިޓީ އަށް ލީގުގައި އަދި ބާކީ 3 މެޗު އެބަ އޮތެވެ.

ލީގުގައި 4 ވަނާގައި އޮތް އާސެނަލް މިރޭ 0000 ގައި ނުކުންނާނީ ނިއު ކާސަލް ޔުނައިޓެޑާ ދެކޮޅަށެވެ. ނިއު ކާސަލް ޔުނައިޓެޑް އެންމެ ފަހުން ކުޅުނު ފަސް މެޗުން ވެސް ވަނީ ބަލިވެފަ އެވެ.

އިއްޔެ ވަނީ ޕްރިމިއާ ލީގުގެ މި ސީޒަނުގެ އެންމެ މޮޅު ކުޅުންތެރިޔާ އަދި އެންމެ މޮޅު ޒުވާން ކުޅުންތެރިޔާ ވެސް ހޮވާފަ އެވެ. މި ސީޒަނުގެ އެންމެ މޮޅު ކުޅުންތެރިޔަކަށް ހޮވިފައިވަނީ ލީގުގައި މިހާތަނަށް 30 ގޯލް ޖަހައިދީފައިވާ ލިވަޕޫލް އަދި އުރުގުއޭގެ ހުނަރުވެރި ފޯވާޑު ލުއިސް ސުއަރޭޒް އެވެ. އަދި އެންމެ މޮޅު ޒުވާން ކުޅުންތެރިޔަކަށް ހޮވިފައިވަނީ ޗެލްސީއަށް މޮޅު ކުޅުމެއް ކުޅެދެމުން އަންނަ  ހުނަރުވެރި ވިންގާ އެޑެން ހަޒާޑެވެ.

މީގެ އިތުރުން ޕްރިމިއާ ލީގު ޓީމް އޮފް ދަ ސީޒަން ގައި ހިމެނޭ ކުޅުންތެރިންނަކީ ޗެލްސީގެ ކީޕަރ ޕީޓަ ޗެކް، ޗެލްސީގެ ޑިފެންޑަރ ގެރީ ކެހިލް، ސިޓީގެ ޑިފެންޑަރ ވިންސެންޓް ކޮމްޕާނީ، ސައުތެމްޕްޓަން ގެ ޑިފެންޑަރ ލޫކް ޝޯ، އެވަޓަންގެ ޑިފެންޑަރ ސީމަސް ކޯލްމަން، ސިޓީގެ މިޑްފީލްޑަރ ޔާޔާ ޓޫރޭ، ސައުތެމްޕްޓަންގެ މިޑްފީލްޑަރ އާދަމް ލަލާނާ އަދި ލިވަޕޫލްގެ މިޑްފީލްޑަރ ސްޓީވަން ޖެރާޑްގެ އިތުރުން ލިވަޕޫލްގެ ސްޓްރައިކަރ ޑެނިއަލް ސްޓަރިޖެވެ.

ރޭ ސްޕެއިންގެ ލަ ލީގާގައި އެތުލެޓިކޯ މެޑްރިޑުން 1-0 އިން ވެލެންސިޔާ ބަލިކޮށް ލީގުގެ އެއްވަނަ ވަނީ ދަމަހައްޓާފަ އެވެ. އަދި ބާސެލޯނާ ވަނީ 3-2 އިން ވިލަރެއާލް ބަލިކޮށް ތާވަލުގެ ދެވަނައަށް ޖެހިލާފަ އެވެ.