ހިރަފުސް ކަޕްގެ ފުރަތަމަ ބުރުގެ އެއްވަނަ ފެހިދޫލައިން ހޯދައިފި އެވެ.
ފެހިދޫލައަށް އެއްވަނަ ލިބުނީ ފުރަތަމަ ބުރު ނިމުނުއިރު ޖުމްލަ 8 ޕޮއިންޓް ހޯދައިގެންނެވެ. ޖުމްލަ ހަ ޓީމު ވާދަކުރާ ހިރަފުސް ކަޕްގެ ފުރަތަމަ ބުރުގައި ކޮންމެ ޓީމެއް ކޮންމެ ޓީމަކާ ކުޅުނުއިރު ސެމީ ފައިނަލަށް ދަނީ އެންމެ ގިނައިން ޕޮއިންޓް ހޯދާ ހަތަރު ޓީމެވެ.
ގޯލުގެ ތަފާތުން 8 ޕޮއިންޓާއެކު ދެވަނައަށް ފިނިހަކަ ދިޔައިރު ގޯލު ތަފާތުން 7 ޕޮއިންޓާއެކު ތިންވަނަ އަށް ދިޔައީ އެލާޓެވެ. ސެމީގެ ފަހު ޖާގަ 7 ޕޮއިންޓާއެކު އެފްސީ ޕޮޓެންޒާ ހޯދިއިރު 5 ޕޮއިންޓާއެކު މުބާރާތުގެ ފަސްވަނައަށް ދިޔައީ ކަށިރޯލާ އެވެ. އަދި 5 ޕޮއިންޓާއެކު މުބާރާތުގެ ފުލަށް ގޮސްފައިވަނީ ފޮސްފަރަސް އެވެ.
ސެމީ ފައިނަލުގެ ފުރަތަމަ މެޗުގައި އަންނަ ބުދަދުވަހު އެއްވަނަ ޓީމު ކަމުގައިވާ ފެހިދޫލައާއި ހަތަރުވަނަ ޓީމު އެފްސީ ޕޮޓެންޒާ ކުޅޭއިރު މުބާރާތް ހުޅުވި މެޗުގައި މި ޓީމު ބައްދަލުކުރި މެޗުވަނީ 1-1 އިން އެއްވަރުވެފަ އެވެ. އަދި ބުރާސްފަތި ދުވަހު ދެވަނަ ސެމީ ފައިނަލުގައި ޓީމް ފިނިހަކަ އަދި އެލާޓް ކުޅޭއިރު މި ދެ ޓީމު ފުރަތަމަ ކުޅުނު މެޗު ނިމުނީ 2-2 އިން އެއްވަރުވެގެންނެވެ.
މުބާރާތުގައި މިހާތަނަށް އެންމެ ގިނަ ލަނޑު ޖަހާފައިވަނީ އެލާޓްގެ ޒައިދު މުހައްމެދެވެ. އޭނާ މިހާތަނަށް ޖުމްލަ 9 ލަނޑު ކާމިޔާބުކޮށްފައިވެ އެވެ.
ޖުމްލަ 96 ކުޅުންތެރިންނާއެކު ކުރިއަށްދާ ހިރަފުސް ކަޕް 7 ގެ ފައިނަލް މެޗު އޮންނާނީ 23 އޯގަސްޓްވާ ހޮނިހިރު ދުވަހުގެ 16:20 ގައި ހިރަފުސް ދަނޑުގަ އެވެ.
