ރިއަލް މެޑްރިޑުން ޗެމްޕިއަންސް ލީގުގެ ތަށި ދިފާއުކުރުމުގެ ކެމްޕެއިން ސްޓައިލުގައި ފަށައިފި

ވޭތުވެދިޔަ ސީޒަނުގެ ޗެމްޕިއަންސް ލީގު ކާމިޔާބުކުރި ރިއަލް މެޑްރިޑުން މި ސީޒަނުގެ ޗެމްޕިއަންސް ލީގުގެ ފެށުން ރަނގަޅުކޮށްފި އެވެ.

ރޮނާލްޑޯ، ބޭލް، ރޮޑްރިގޭޒް އަދި ބެންޒީމާ ރޭ ސްވިޒަލެންޑްގެ ބަސެލްއާ ދެކޮޅަށް ކުޅުނު މެޗުގައި ލަނޑު ޖަހާފައިވާއިރު މެޗު ނިމިގެން ދިޔައީ 5-1 އިންނެވެ. ފުރަތަމަ ހާފު ނިމުމުގެ ކުރިން ރިއަލްއިން 4 ލަނޑު ޖަހާފައިވާއިރު، ރިއަލްއިން ދެން ޖެހި ލަނޑަކީ ބަސެލްގެ މާރެކް ސޫޗީގެ އަތުން ބައިކޮޅަށް ވަން ލަނޑެކެވެ.  ބަސެލްއިން ޖެހި ހަމައެކަނި ލަނޑު ޖަހާފައިވަނީ ޑާލިސް ގޮންޒާލޭޒް އެވެ.

ރޭ ގްރޫޕް އޭ ގައި ކުޅުނު އަނެއް މެޗުގައި ލިވަޕޫލްއިން ވަނީ ފަހު ވަގުތު ލިބުނު ޕެނަލްޓީއެއް ކާމިޔާބުކޮށް 2-1 އިން ޕީއެފްސީ ލޫޑޯގޮރެޓްސް ބަލިކޮށްފަ އެވެ. މެޗުގެ ފުރަތަމަ ލަނޑު ޖަހާފައިވަނީ މެޗު ނިމެން 8 މިނެޓަށްވެފައިވަނިކޮށް މާރިއޯ ބަލޮޓެއްލީ އެވެ. އިތުރު ވަގުތުގައި ލޫޑޯގޮރެޓްސް އިންވަނީ އެއްވަރުވެސް ކޮށްފަ އެވެ.

ވޭތުވެދިޔަ ސީޒަނުގައި ރިއަލް މެޑްރިޑްގެ އަތުން ފައިނަލުގައި ބަލިވި އެތުލެޓިކޯ މެޑްރިޑުން ރަށުން ބޭރުގައި އޮލިމްޕިއާކޯސްއާ ދެކޮޅަށް ކުޅުނު މެޗުން ވަނީ 3-2 އިން ބަލިވެފަ އެވެ.

ކާލޯސް ޓެވޭސް 59 ވަނަ މިނެޓްގައި އަދި 90 ވަނަ މިނެޓްގައި ޖަހައިދިން 2 ލަނޑާއެކު ޔުވެންޓަސް ވަނީ ޗެމްޕިއަންސް ލީގަށް މުޅީން އަލަށް ކޮލިފައިވި ސްވިޑެންގެ މަލްމޯ އެފްއެފް 2-0 އިން ބަލިކޮށްފަ އެވެ. ރޭ ޓެވޭޒް ޖެހި ފުރަތަމަ ލަނޑަކީ ޗެމްޕިއަންސް ލީގުގައި ލަނޑެއް ނުޖެހި 14 މެޗު ހަމަކުރުމަށްފަހު ޓެވޭޒް އަށް ކާމިޔާބުކުރެވުނު ފުރަތަމަ ގޯލެވެ.

10 އަހަރަށްފަހު ޗެމްޕިއަންސް ލީގަށް ކޮލިފައިވި މޮނާކޯ އިން ވަނީ މޯޓީނީއޯ ދެވަނަ ހާފުގައި ކާމިޔާބުކޮށްދިން ހަމައެކަނި ލަނޑާއެކު ބަޔާން ލެވަކޫސަން 1-0 އިން ބަލިކޮށްފަ އެވެ. ގްރޫޕް ސީގައި ދެން ކުޅުނު އަނެއް މެޗުގައި ގަލަތަސަރާއީއާ އާރުއެސްއީ އެންޑަލެކްޓް ކުޅުނު މެޗު ވަނީ 1-1 އިން އެއްވަރުވެފަ އެވެ.

ސީރޯ އިމޯބައިލް އަދި އައުބާމެޔާންގެ ގެ ލަނޑުތަކުން ޑޯޓްމަންޑުން 2-0 އިން އާސެނަލް ބަލިކޮށްފައިވާއިރު ގުރޫޕް ޑީ ގެ އަނެއް މެޗުގައި ޒެނިތު އެސްޓީ ޕީޓާސްބާގް އިން ވަނީ ރަށުން ބޭރުގައި ބެންފީކާ ބަލިކޮށްފަ އެވެ. މެޗުގައި ފެނިގެން ދިޔަ ދެ ލަނޑުވެސް ފުރަތަމަ ހާފުގެ ކުރީކޮޅު ފެނިގެން ދިޔައިރު ބުރެޒިލްގެ ހަލްކް ވަނީ މި ސީޒަނުގައި އޭނާޖެހި ފުރަތަމަ ލަނޑާއެކު މެޗުގެ 5 ވަނަ މިނެޓްގައި ލީޑު ހޯދައިފީފަ އެވެ. އަދި ބެންފީކާގެ ކީޕަރަށް ރަތްކާޑު ދައްކާ މެޗުގެ 18 ވަނަ މިނެޓްގައި ދަނޑުން ފޮނުވާލާފައިވާއިރު އެކްސެލް ވިޓްސެލް ވަނީ އޭނާގެ ކުރީގެ ކުލަބާ ދެކޮޅަށް މެޗުގެ 22 ވަނަ މިނެޓްގައި ލަނޑެއްޖަހާ ޓީމު މޮޅުކޮށްދީފަ އެވެ.

މިރޭވެސް ޗެމްޕިއަންސް ލީގުގައި ގުރޫޕް އީ، އެފް، ޖީ އަދި އެޗް ގެ މެޗުތައް ކުޅުމަށް ހަމަޖެހިފައިވާއިރު ހުރިހާ މެޗެއްވެސް ފެށޭނީ ރާއްޖެ ގަޑިން 23:45 ގަ އެވެ.

[yass cats=117]