މެންޗެސްޓަރ ޔުނައިޓެޑުން އާސެނަލް ބަލިކުރިއިރު ޗެލްސީގެ ލީޑު ފުޅާކޮށްފި

އިނގިރޭސި ޕްރިމިއަރ ލީގުގައި މެންޗެސްޓަރ ޔުނައިޓެޑުން އާސެނަލް ބަލިކުރިއިރު ޗެލްސީއިން އެ ޓީމުގެ ލީޑު ފުޅާކޮށްފި އެވެ.

ރޭ އާސެނަލްގެ އެމިރޭޓްސް ސްޓޭޑިއަމްގައި ކުޅުނު މެޗު ޔުނައިޓެޑުން ކާމިޔާބުކުރީ 2-1 އިންނެވެ. ރޭގެ މެޗުގެ ކުރީކޮޅު އާސެނަލްއިން ރަނގަޅަށް ކުޅުނު ނަމަވެސް މެޗުގެ މޭން އޮފް ދަ މެޗުގެ މަޤާމު ހޯދި ޔުނައިޓެޑްގެ ކީޕަރ ޑެ ހެއާގެ ފަރާތުން ވަނީ މޮޅު ކުޅުމެއް ފެނިފަ އެވެ.

ރޭގެ މެޗުގެ ފުރަތަމަ ހާފުގައި ލަނޑެއް ފެނިފައިނުވި ނަމަވެސް ދެވަނަ ހާފު ފަށައިގެން މާގިނައިރުތަކެއްނުވެ ޔުނައިޓެޑުން ވަނީ ލީޑު ހޯދާފަ އެވެ. މިއީ އެންޓޯނިއޯ ވެލެންސިޔާ ފޮނުވާލި ބާރު ބޯޅައެއް އާސެނަލްގެ ޑިފެންޑަރ ކިއެރަން ގިބްސްގެ ފައިގައި ޖެހި ބައިކޮޅަށް ވަން ލަނޑެކެވެ.

މެޗުގެ ފަހު ކޮޅު އާސެނަލްއިން އެއްވަރުކުރުމަށް ކުރިއަށްޖެހި ތިއްބައި ޑި މާރިއާ އަދި ރޫނީ ގުޅިގެން އުފެއްދި ހަމަލާއެއް ރޫނީ ކާމިޔާބުކޮށް ޔުނައިޓެޑުން ވަނީ ލީޑު ފުޅާކޮށްފަ އެވެ. އާސެނަލްގެ ހަމައެކަނި ގޯލު މެޗުގެ އިތުރު ވަގުތުގައި ޖަހައިދިނީ ބަދަލު ކުޅުންތެރިއެއްގެ ގޮތުގައި އެރި އޮލިވިއަރ ގިރޫޑް އެވެ.

ރޭގެ ލޫކް ސޯވްގެ އިންޖަރީއާއެކު މި ސީޒަނުގައި ޔުނައިޓެޑަށް ކުރިމަތިވި އިންޖަރީގެ މައްސަލަތަކުގެ އަދަދު ވަނީ 40 އަށް އަރާފަ އެވެ.

ޑިއޭގޯ ކޯސްޓާ އަދި އެޑެން ހަޒާޑްގެ ލަނޑުތަކުން ޗެލްސީއިން 2-0 އިން ވެސްޓް ބުރޮމް ބަލިކޮށް ޗެލްސީއިން ވަނީ ދެވަނާގައި އޮތް ސައުތެމްޕްޓަންއަށްވުރެ 7 ޕޮއިންޓް ކުރިއަށް ޖެހިލާފަ އެވެ. މި މެޗުގެ ލަނޑުތައް މެޗުގެ ކުރީކޮޅު ފެނިގެންދިޔައިރު 29 ވަނަ މިނެޓްގައި ވެސްޓް ބުރޮމްގެ ކުލައުޑިއޯ ޔާކޮބް އަށް ވަނީ ރަތް ކާޑެއް ދައްކާފަ އެވެ.

އެވަޓަން އަށް ލިއޮން އުސްމަން ކުޅެދިން 400 ވަނަ މެޗުގައި ލަނޑު ޖަހައިދީ ވެސްޓް ހޭމް ބަލިކުރީ 2-1 އިންނެވެ. މި މެޗުގައި އެވަޓަންގެ ލުކާކޫ ލީޑު ނަގާދީފައިވަނިކޮށް  ޒަރާޓޭ ވަނީ ލަނޑެއްޖަހާ އެއްވަރުކޮށްފަ އެވެ.

ވިލްފްރައިޑް ބޯނީ ލީޑު ނަގައިދީފައިވަނިކޮށް ސްޓީވަން ހޮވެޓިކް އަދި އަދި ޔާޔާ ޓޫރޭ ޖަހައިދިން ލަނޑުތަކުން މެންޗެސްޓަރ ސިޓީއިންވަނީ 2-1 އިން ސްވެންސީ ބަލިކޮށްފަ އެވެ.

މޫސާ ސިސޯކޯގެ ހަމައެކަނި ލަނޑުން ނިއުކާސަލްއިން ކިއުޕީއާރު ބަލިކުރިއިރު ޑެނީ އިންގްސް މެޗުގެ 12 އަދި 13 ވަނަ މިނެޓްގައި ޖަހައިދިން ލަނޑުތަކުން ބާންލީ ވަނީ 2-1 އިން ސްޓޯކް ސިޓީ ބަލިކޮށްފަ އެވެ. ސްޓޯކް ސިޓީގެ ހަމައެކަނި ލަނޑު ޖަހައިދިނީ ޖޮނަތަން ވޯލްޓާސް އެވެ.

މިރޭ ލީގުގައި ކުޅޭ މެޗުތަކުގައި 1830 ގައި ކުރިސްޓަލް ޕެލަސްއާއި ލިވަޕޫލް ކުޅޭއިރު ހަލްސިޓީ އަދި ޓޮޓެންހަމް ކުޅޭ މެޗު ފަށާނީ 21:00 ގަ އެވެ.