ނޭކުރަންދޫ އެންޑް ފުޓްސަލް މުބާރާތުގައި 9 ޓީމަކުން ބައިވެރިވެއްޖެ

ނޭކުރަންދޫ އެންޑް ޖަމިއްޔާގެ ފަރާތުން ކޮންމެ އަހަރަކު ކުރިޔަށް ގެންދާ އެންޑް ފުޓްސަލް މުބާރާތް މި އަހަރު 9 ޓީމަކުން ބައިވެރިވެއްޖެ އެވެ.

މި ނޫހަށް މައުލޫމާތު ދެމުން އެ ޖަމިއްޔާގެ ސެކެޓްރީ މުހައްމަދު ސިޒާން ވިދާޅުވީ މުބާރާތް ފަށަން ހަމަޖެހިފައިވަނީ މިއަންނަ މަހު 6 ގައި ކަމަށެވެ.

އެގޮތުން މި މުބާރަތުގައި މިއަހަރު ބައިވެރިވެފައިވަނީ ނޭކުރަންދޫގެ 7 ޓީމާއި ކުޅުދުއްފުށީގެ 2 ޓީމެވެ. ނޭކުރަންދޫއިން ބައިވެރިވެފައި ވަނީ އެރަށު މާރިޒިންސް، ކުލަބް ސިވިކް، ނިއު ޕާސް، އެކްސް ޒީރޯ، ދެ ސިވިކް، ސެނޮން އަދި ކުލަބް ފިރިކް އެވެ. ކުޅުދުއްފުށިން ބައިވެރިވެފައިވަނީ ކުޅުދުއްފުށިން ރީޖަނަލް ހޮސްޕިޓަލުންނާއި ދިރާގުންނެވެ.

މި މުބާރާތުގައި ޗެމްޕިއަން ޓީމާއި، ރަނަރަޕް ޓީމުގެ އިތުރުން އެންމެ މޮޅު 5 ކުޅުންތެރިންނާއި އެންމެ ސަޕޯޓިން ޓީމުވެސް ހޮވުމަށް ހަމަޖެހިފައި ވާ ކަމަށް ސިޒާން ވިދާޅުވި އެވެ.

އިތުރަށް މައުލޫމާތު ދެމުން ސިޒާން ވިދާޅުވީ މުބާރަތައް ނޭކުރަންދޫގެ ވިޔަފާރިވެރިންގެ ފަރާތުން އެހީތެރިކަން ލިބިފައިވާކަމަށާއި އެހެންނަމަވެސް އަދި ވަކި ސްޕޮންސާއެއް ހަމަނުޖެހޭ ކަމަށެވެ.