ބޭސިކް ފުޓްބޯޅަ ކޯޗިން ކޭމްޕް ނިމި ބައިވެރިންނަށް ސެޓްފިކެޓް ދީފި

ހދ ކުޅުދުއްފުށީގައި ބޭއްވި އޭ.އެފް.ސީ އިންޓްރޮޑަކްޓަރީ ކޯޗިން ކޭމްޕް ނިމި ބައިވެރިންނަށް ސެޓްފިކެޓް ދީފި އެވެ.

ރޭ ސުފުރާމަތީގައި ބޭއްވި ރަސްމިއްޔާތު ޝަރަފުވެރިކޮށްދެއްވާ ބައިވެރިންނަށް ސެޓްފިކެޓް ބައްސަވާ ދެއްވީ އާދަމް އިސްމާއީލް ދެބުދާރުގެ އެވެ. މި ކޯހުގައި ކިޔަވާދެއްވީ އެފް.އޭ.އެމް ގެ ތަޖުރިބާކާރު އިންސްޓްރަކްޓަރ މުހައްމަދު އާދަމް އެވެ. މިއީ ފުޓްބޯޅަ ކޯޗިންގެ ދާއިރާއިން އޭ ލައިސަންސް ހާސިލުކުރައްވާފައިވާ ބޭފުޅެކެވެ.

މޯލްޑިވްސް ނެސަނަލް އިންސްޓިޓިއުޓް އޮފް ސްޕޯޓްސް އާއި އެފްއޭއެމް އަދި ކުޅުދުއްފުށީ ކައުންސިލް އިދާރާ ގުޅިގެން ކުރިއަށް ގެންދިޔަ މި ކޯސް ހިންގާފައިވަނީ ޒޯން ސްޓޭޑިއަމް 1 އަދި އަފީފުއްދީން ސްކޫލްގަ އެވެ. މި ހިނގާ މެއި މަހުގެ 21-25 އަށް ކުރިއަށް ދިޔަ މި ކޯޗިން ކޭމްޕްގައި ޖުމްލަ 25 ފަރާތަކުން ބައިވެރިވެފައިވެ އެވެ.

ކުޅުދުއްފުށީ ކައުންސިލް މެމްބަރު އިބްރާހިމް އައްބާސް މައުލޫމާތު ދެއްވި ގޮތުގައި މީގެ އެޑްވާންސް ކޯހެއް ނުވަތަ ސީ ލައިސަންސް ކޯހެއް މި އަހަރު ނިމުމުގެ ކުރިން ކުރިއަށް ގެންދިއުމަށް މަސައްކަތް ކުރާނެ ކަމަށެވެ.

މިހާރު ކުޅުދުއްފުށީގައި ރެފްރީން ތަމްރީން ކުރުމުގެ ޕްރޮގްރާމެއް ދަނީ ހިންގަމުންނެވެ.