ފީފާގެ ރައީސްކަމުގެ މަޤާމުން ބްލެޓާ އިސްތިއުފާ ދެއްވަން ނިންމައިފި

ފީފާގެ ރައީސް ކަމުގެ އާ ދައުރަކަށް މިދިޔަ ހުކުރު ދުވަހު އިންތިހާބުވި ސެޕް ބްލެޓާ އެ މަޤާމުން އިސްތިއުފާ ދެއްވަން ނިންމައިފި އެވެ.

1998 ވަނަ އަހަރުން ފެށިގެން ފީފާގެ ރައީސްކަން ކުރަމުން އަންނަ ބްލެޓާ މަޤާމުން އިސްތިއުފާ ދެއްވަން ނިންމީ ރޭ ވަރަށް ކުއްލި ގޮތަކަށް ނޫސްވެރިންނާ ބައްދަލުކުރައްވައި ދެއްވި ބަޔާނެއްގަ އެވެ. ފީފާގެ ރައީސްކަމަށް ބްލެޓާ ހޮވިވަޑައިގަތީ މިދިޔަ ހުކުރު ދުވަހު އޮތް ފީފާގެ 57 ވަނަ ކޮންގްރެސްގެ ދެވަނަ ބުރުގައި ޖޯޑަންގެ ޕްރިންސް އަލީ ވާދަ ނުކުރަން ނިންމުމުންނެވެ.

ފީފާގެ ކޮންގްރެސްއެއް ދެން އެންމެ އަވަހަށް އޮންނާނީ 13 މެއި 2016 ގަ އެވެ. ނަމަވެސް ބްލެޓާގެ ވާހަކަފުޅުގައި ވީ އެންމެ އަވަހަކަށް ރައީސަކު އިންތިހާބު ކުރުމަށްޓަކައި އެކްސްޓްރާ އޯޑިނަރީ ކޮންގްރެސް އެއް ބޭއްވުމަށް ވަނީ ގޮވާލައްވާފަ އެވެ.

ކޮރަޕްޝަނުގެ ތުހުމަތުތަކެއް ކުރެވެމުންދާ މި ދަނޑިވަޅުގައި ފީފާގެ އިސް އޮފިސަލުންތަކަކާ ދެކޮޅަށް އެމެރިކާގެ ޖަސްޓިސް ޑިޕާޓްމަންޓުން ދަނީ ތަހްޤީޤެއް ކުރިއަށް ގެންދަމުންނެވެ.

އުމުރުފުޅޫން 79 އަހަރުގެ ބްލެޓާ ފީފާއަށް 40 އަހަރު ވަނީ ހިދުމަތް ކުރައްވާފައި ވާއިރު އެންމެ ފުރަތަމަ ފީފާއާ ގުޅިވަޑައިގަތީ މާކެޓިން އޮފިޝަލެއްގެ ގޮތުގަ އެވެ.