ފައިނަލަށް ހިރަފުސް އަދި އެފްސީ ބިއަޑް

ކްލަބް ކޮރަލްސް ފުޓްސަލް ޗެލެންޖްގެ ފައިނަލަށް ހިރަފުސް އަދި އެފްސީ ބިއަޑް ދަތުރުކޮށްފި އެވެ.

މިރޭ ކުޅެވުނު ސެމީ ފައިނަލުގެ ފުރަތަމަ މެޗުގައި ހިރަފުސް އިން ވަނީ 10-4 އިން ހޮޓްސޮޓް ބަލިކޮށްފަ އެވެ. މެޗުގެ ކުރީކޮޅު ހިރަފުސް އިން 4 ލަނޑު ޖަހައި ލީޑު ހޯދިއިރު ހޮޓްސޮޓުން ކުޅުން ރަނގަޅުކޮށް ދެ ލަނޑު ޖަހާފައިވެ އެވެ.

ފަހު ހާފު ފަށައިގެން ރަނގަޅަށް ކުޅެ 5-3 އަށް ފަރަޤު ކުޑަކުރި ނަމަވެސް ހިރަފުސް އިން ވަނީ އަލުން ކުޅުން ރަނގަޅުކޮށް މެޗު ކޮންޓްރޯލްކޮށްފަ އެވެ.

މެޗުގެ މޮޅު ކުޅުންތެރިޔަކަށް ހޮވިފައިވަނީ ހިރަފުސްއަށް 3 ލަނޑު ކާމިޔާބުކޮށްފިން އަލީ އާދަމް (ބާޑޭ) އެވެ.

މިރޭގެ ދެވަނަ ސެމީ ފައިނަލްގައި އެފްސީ ބިއަޑްއިން ވަނީ 12-3 ގެ ތަފާތު ބޮޑު ނަތީޖާއަކުން އެފްސީ ނިޑޭ ބަލިކޮށްފަ އެވެ. މުޅި މެޗުވެސް ބިއަޑްއިން ކޮންޓްރޯލްކުރިއިރު ފުރަތަމަ ހާފު ނިމިގެން ދިޔައީ 7-1 އިންނެވެ.

މެޗުގެ މޮޅު ކުޅުންތެރިޔަކަށް ހޮވިފައިވަނީ ބިއަޑްއަށް 4 ލަނޑު ޖަހައިދިން ހަސަން މުހައްމަދު އެވެ.

ފައިނަލު މެޗު އޮންނާނީ 9 ޖުލައިވާ އަންގާރަ ދުވަހުގެ 22:00 ގައި އެސްޓީއޯ ނޫފަހި އެރީނާގަ އެވެ.