ހަނިމާދޫ އޮފީސްތަކުގެ ވޮލީބޯޅަ މުބާރާތުގެ ޗެމްޕިއަންކަން ހަނިމާދޫ ޕޮލިސް ސްޓޭޝަންގެ ޓީމް ހޯދައިފި

މިނިވަން ރަންޔޫބީލް ފާހަގަ ކުރުމުގެ ގޮތުން ހދ.ހަނިމާދޫ ކައުންސިލް އިދާރާއިން އިންތިޒާމްކޮށްގެން އޮފީސްތަކުގެ މެދުގައި ބޭއްވި ވޮލީބޯޅަ މުބާރާތުގެ ޗެމްޕިއަންކަން ހަނިމާދޫ ޕޮލިސް ސްޓޭޝަންގެ ޓީމް ހޯދައިފި އެވެ.

ޕޮލިސް ޓީމް މި މުބާރާތުގެ ޗެމްޕިއަންކަށް ހޯދީ ފައިނަލް މެޗްގައި އޭވިއޭޝަން ސެކިއުރިޓީގެ ޓީމާ ވާދަކޮށް ފަސޭހަކަމާއެކު ސީދާ 03 ސެޓުން މެޗް ކާމިޔާބުކޮށްގެންނެވެ. ފައިނަލް މެޗްގެ މޮޅު ކުޅުންތެރިޔާގެ މަޤާމަށް ހޮވިފައިވަނީ ޕޮލިސް ޓީމްގެ ޕޮލިސް ލާންސް ކޯޕްރަލް ސޯދިގު މޫސާއެވެ.

ފައިނަލް މެޗް ނިމުމުން ވަނަވަނަ އައި ފަރާތްތަކަށް އިނާމު ހަވާލުކޮށްދެއްވީ ފައިނަލް މެޗްގެ ޝަރަފްޗެރި މެހެމާން ހަނިމާދޫ އެއަރޕޯރޓްގެ މެނޭޖަރ އަލީ ވަހީދުއެވެ.

މިމުބާރާތުގައި ފުލުހުންގެ އިތުރުން ހަނިމާދޫ ސިއްހީ މަރުކަޒާއި ހަނިމާދޫ ސްކޫލާއި ހަނިމާދޫ ފެނަކަ ކޯރޕަރޭޝަން އާއި އޭވިއޭޝަން ސެކިއުރިޓީ ހަނިމާދޫ އާއި ހަނިމާދޫ އެއަރޕޯރޓް އަދި ހަނިމާދޫ އޮބްސަރވޭޓަރީ އިން ބައިވެރިވެފައިވެއެވެ.