މި ހުކުރު ދުވަހު ނޮޅިވަރަމްގައި ބޭއްވުމަށް ހަމަޖެހިފައިވާ މިނިވަން 50 ފުޓްބޯޅަ މުބާރާތުގެ ހދ އަތޮޅުގެ ދެ ވަނަ މެޗަށް ސަޕޯޓަރުން ގެންދިއުމަށް 2 ފެރީ ހަމަޖައްސައިފި އެވެ.
މި ނޫހަށް މައުލޫމަތު ދެމުން ކުޅުދުއްފުށީ ކައުންސިލް މެމްބަރު އިބްރާހިމް އައްބާސް ވިދާޅުވީ ނޮޅިވަރަމާއި ކުޅުުދުއްފުށީ ބައްދަލު ކުރާ މި މެޗަށް ސަޕޯޓަރުން ގެންދިއުމަށް ހަމަޖެހިފައިވަނީ ހުކުރު ދުވަހު 2:30 ގައި ހޯރަ އަދި ހޯގޮޅާ ފެރީން ކަމަށެވެ. އެހެންނަމަވެސް ޓީމް ގެންދިއުމަށް ހަމަޖެހިފައިވާ މިލޭނިއަމް ފެރީގައި ޖާގަ އިތުރު ވެއްޖެނަމަ އެ ފެރީންވެސް ސަޕޯޓަރުންނަ ދަތުރުކުރެވޭނެ ކަމަށްވެސް އައްބާސް ވިދާޅުވި އެވެ.
އެހެން ނަމަވެސް ކުޅުންތެރިން ނޮޅިވަރަމަށް ފުރުމަށް ހަމަޖެހިފައިވަނީ ހުކުރު ދުވަހު 1:45 ގަ ކަމަށް އައްބާސް ވިދާޅުވި އެވެ.
މެޗު ނިންމުމަށް ފަހު ސަޕޯޓަރުން ކުޅުދުއްފުއްޓަށް ގެނައުމަށް އަދި ވަކި ގަޑިއެއް ހަމަޖެހިފަ ނުވާ ކަމަށްވެސް އައްބާސް ވިދާޅުވި އެވެ.