ފޯކައިދޫ ޓީމްގެ ކޮންމެ ކުޅުންތެރިޔަކަށް ފައިސާގެ ހާރަކުން މަރުހަބާ ކިޔައިފި

މިނިވަން 50 ފުޓްބޯޅަ މުބާރާތުން މުޅި ރާއްޖެއިން ހަތަރު ވަނަ ހޯދި ފޯކައިދޫ ޓީމު ރަށަށް ދިއުމުން ހޫނު މަރުހަބާއެއް ރަށުގެ ރައްޔިތުން ކިޔައިފި އެވެ.

މުބާރާތްތަކުން ރަންވަނަ ތަކާއި އެފަދަ އެހެން ކާމިޔާބީތައް ހޯދައިގެން ރަށްރަށް އައުމުން ގިނަ ރަށްރަށުން މަރުހަބާ ކިޔަނީ މަލުގެ ހާރަކުންނެވެ.

ނަމަވެސް ރޭގައި ފޯކައިދޫ ޓީމް ރަށްރަށަށް ދިއުމުން މަރުހަބާ ކިޔަފައިވަނީ ތަފާތު ގޮތަކަށެވެ. މަލުގެ ހާރުގެ ބަދަލުގައި ކޮންމެ ކުޅުންތެރިއެއްގެ ކަރުގައި އަޅުވާފައިވަނީ ރުފިޔާ ނޫޓުން ހަދާފައިވާ ހާރެކެވެ. ކުޅުންތެރިންގެ އިތުރުން މެނޭޖްމެންޓާއި ޓީމްގެ އޮފިޝަލުންނަށް ވެސް މަރުހަބާކީ ރުފިޔާގެ ހާރަކުންނެވެ.

އެކަމުގައި އިސްކޮށް އުޅުނު ފަރާތެއް ބުނީ އަތޮޅު ޗެމްޕިއަންކަން ހޯދައި ޒޯން ޗެމްޕިއަންކަން ހޯދައި މުޅި ރާއްޖެއިން 4 ވަނަ ފޯކައިދޫ ހޯދުމުން އެމީހުން ފަހުރުވެރިވާ ކަމަށެވެ. ޓީމަށް ނިސްބަތްވާ ކޮންމެ ފަރާތެއްގެ ކަރުގައި 500 ރުފިޔާއަށްވުރެ މަދު ނޫން އަދަދެއް ފައިސާގެ ހާރުގަ ހިމެނޭނެ ކަމަށް އޭނާ ބުންޏެވެ.

ޓީމު ރަށަށް އައުމުން ރޭ އެޓީމަށް ކެއުމެއް ވެސް ރައްޔިތުންގެ ފަރާތުން ވަނީ ދީފައެވެ. ފޯކައިދޫ ޓީމް ސެމީއަށް ދިއުމުންވެސް އެރަށުގެ ރައްޔިތުން ވަނީ ރުފިޔާ ހަރުކޮށްފައިވާ ގަހެއް ހަދިޔާކޮށްފަ އެވެ.

މިނިވަން ފަންސާސް ފުޓްބޯޅަ މުބާރާތުގައި ފޯކައިދޫ ޓީމު ސެމީފައިނަލުން ކަޓާފައިވަނީ މުބާރާތުގެ ޗެމްޕިއަންކަން ހޯދި އައްޑޫ ފޭދޫ ޓިމުގެ އަތުންނެވެ. މުބާރާތުގެ ތިންވަނަ ހޮވި މެޗުގައި އޭދަފުށީ ޓީމު އަތުން ބަލިވެ ފޯކައިދޫ ދިޔައީ މުބާރާތުގެ ހަތަރުވަނަ އަށެވެ. މި މުބާރާތަކީ މުޅި ރާއްޖެއަށް ހުޅުވާލައިގެން ބޭއްވި މުބާރާތެކެވެ.