ކުޅުދުއްފުށީ ކައުންސިލް އިންޓަރ އޮފީސް ފުޓްސަލް މުބާރާތުގެ ޗެމްޕިއަންކަން އެސްޓީއޯ ހޯދައިފި

ކުޅުދުއްފުށީ ކައުންސިލް އިންޓަރ އޮފީސް ފުޓްސަލް މުބާރާތުގެ ޗެމްޕިއަންކަން އެސްޓީއޯ ހޯދައިފި އެވެ. އެސްޓީއޯ އިން ޗެމްޕިއަންކަން ހޯދީ 4-3 އިން ޕޮލިސް ބަލިކޮށްގެންނެވެ.

ކުޅުދުއްފުށީ ފުޓްސަލް އެރީނާގައި ކުޅުނު ފައިނަލް މެޗުގައި ފުރަތަމަ ލަނޑު ޖަހައި ލީޑު ނެގީ އެސްޓީއޯ އާރްސީއިންނެވެ. މި ލަނޑު އެ ޓީމަށް ކާމިޔާބުކޮށްދިނީ މެޗުގެ 4 ވަނަ މިނެޓްގައި އެސްޓީއޯގެ ޖާޒީ ނަންބަރު 8 އަލީ ޝައިހާން (އައްޔަ) އެވެ. އަދި އޭގެ ކުޑައިރުކޮޅެއް ފަހުން އެސްޓީއޯގެ ޖާޒީ ނަންބަރު 11 އަޔާޒް އަހްމަދު (އަޔާ) ވަނީ އިތުރު ލަނޑެއް ޖަހައި ލީޑު ފުޅާކޮށްފަ އެވެ.

މި ލަނޑާއެކު ޕޮލިހުން ވަނީ ކުޅުން ރަނގަޅުކޮށް ލަނޑެއް ކާމިޔާބުކޮށްފަ އެވެ. މިއީ މެޗުގެ 12 ވަނަ މިނެޓްގައި ޕޮލިސްގެ ޖާޒީ ނަންބަރު 1 ފަރުހަތު މުހައްމަދު (ފަރޭ) ކާމިޔާބުކުރި ލަނޑެކެވެ. ނަމަވެސް ފުރަތަމަ ހާފު ނިމުމުގެ ކުރިން މެޗުގެ 19 ވަނަ މިނެޓްގައި އެސްޓީއޯގެ އަޔާ ވަނީ ދުރު ޕެނަލްޓީއަކުން ލަނޑެއް ޖަހައި ލީޑު ފުޅާކޮށްފަ އެވެ.

ދެވަނަ ހާފު އިންޖަރީ ވެގެން އަޔާ ނުލައި ފެށި އެސްޓީއޯ ޓީމަށް ޕޮލިސް ޓީމުން ނުރައްކާ ކޮށްފައިވާއިރު މެޗުގެ 26 ވަނަ މިނެޓްގައި އެ ޓީމުގެ މުހައްމަދު އަލީ (ރުއްކެ) ވަނީ ލަނޑެއް ޖަހައި ފަރަޤު ކުޑަކޮށްފަ އެވެ. ނަމަވެސް އޭގެ ކުޑައިރުކޮޅެއް ފަހުން އެސްޓީއޯގެ އިބްރާހިމް އާސިފް (އަފައި) ވަނީ ކައުންޓަރ އެޓޭކެއްގައި ލަނޑު ޖަހާފަ އެވެ. ޕޮލިސް ޓީމުގެ އަލީ ރިޝްވާން މެޗުގެ 38 ވަނަ މިނެޓްގައި ލަނޑެއް ޖަހައި 4-3 އަށް ވަނީ ނަތީޖާ ބަދަލުކޮށްލާފަ އެވެ.

މެޗުގައި ރެފްރީއާ މެދު ހިނގި ދެބަސްވުމަކަށްފަހު، ފަހު ހާފުގެ 22 ވަނަ މިނެޓްގައި ޕޮލިސް ކުޅުންތެރިން ދަނޑުން ފައިބާފައިވާއިރު ރެފްރީ ވަނީ އެސްޓީއޯ މޮޅުވީ ކަމަށް ނިންމާ މެޗު ނިންމާލާފަ އެވެ.

ފައިނަލް މެޗުގެ މޮޅު ކުޅުންތެރިޔަކަށް ހޮވިފައިވަނީ އެސްޓީއޯ އާރްސީ ޖާޒީ ނަންބަރު 10 މުހައްމަދު ޝާފިއު އެވެ.

މި މުބާރާތުގައި 26 ގޯލު ޖަހައިގެން އެންމެ ގިނަ ގޯލު ޖެހި ކުޅުންތެރިޔަކަށް ޕޮލިސް ޓީމުގެ ޖާޒީ ނަންބަރު 15 އަލީ ރިޝްވާން ހޮވިފައިވާއިރު މުބާރާތުގެ ފެއަރ ޕްލޭ ޓީމަކަށް ހޮވިފައިވަނީ ސިވިލް ފަޔާ އެވެ.

މި މުބާރާތުގެ އެންމެ މޮޅު ފަސް ކުޅުންތެރިންނަށް ހޮވިފައިވަނީ އެސްޓީއޯ ގެ ޖާޒީ ނަންބަރު 10 މުހައްމަދު ޝާފިއު އާއި، ޖާޒީ ނަންބަރު 1 އަމްޖަދު މުސާ(މުޖޭ) އާއި ޖާޒީ ނަންބަރު 67 ހަސަން މުހައްމަދު (ނޫވިލޭ) އާއި ޕޮލިސް ޓީމުގެ ޖާޒީ ނަންބަރު 15 އަލީ ރިޝްވާން(ރިޝޭ) ގެ އިތުރުން އެ ޓީމުގެ ޖާޒީ ނަންބަރު 7 އަހްމަދު މުހައްމަދު (ވެނިސް) އެވެ.