އިންޓަރ އޮފީސް ވޮލީބޯލް ޓޯނަމަންޓް ގެ ޗެމްޕިއަންކަން ވިދިވިދިގެން ދެވަނަ ފަހަރަށް ފެނަކައިން ހޯދައިފި

އިންޓަރ އޮފީސް ވޮލީބޯލް ޓޯނަމަންޓް ގެ ޗެމްޕިއަންކަން ވިދިވިދިގެން ދެވަނަ ފަހަރަށް ފެނަކައިން ހޯދައިފި އެވެ.

މި އަހަރުގެ މުބާރާތުގައި ކުޅުނު ފައިނަލު މެޗު ފެނަކައިން ކާމިޔާބުކުރީ ކަސްޓަމްސްއާ ވާދަކޮށް ސީދާ ތިން ސެޓުން މެޗު ކާމިޔާބުކޮށްގެންނެވެ.

މި މުބާރާތުގެ އެންމެ މޮޅު ކުޅުންތެރިޔަކަށް ހޮވިފައިވަނީ ފެނަކަ ޓީމުން ވޭތުވެދިޔަ އަހަރުވެސް ފާހަގަވެފައިވާ ފެނަކަ ޓީމުގެ ޖާޒީ ނަންބަރު 18 އަލީ ވަހީދު (ޖަބޭ) އެވެ.

މި މުބާރާތުގެ މޮޅު 6 ކުޅުންތެރިންނަށް ހޮވިފައިވަނީ ޖަބޭގެ އިތުރުން ފެނަކައިގެ ޖާޒީ ނަންބަރު 3 އަހްމަދު ހަސަން (ނޫވިލް)، ހަމަ އެ ޓީމުގެ ޖާޒީ ނަންބަރު 12 މޫސާ ރަޝީދު، ރަނަރއަޕް ކަސްޓަމްސް ގެ ޖާޒީ ނަންބަރު 11 މުހައްމަދު އާތިފް، ކަސްޓަމްސްގެ ޖާޒީ ނަންބަރު 1 މުހައްމަދު އިބްރާހިމް (ޖަގޭ) ގެ އިތުރުން ކެމްޕަސް ޓީމުގެ ޖާޒީ ނަންބަރު 10 އަބްދުލް ޝަހީދު އެވެ.

މި މުބާރާތުގެ އެންމެ މޮޅު ކޯޗަކަށް ފެނަކަ ޓީމުގެ ކޯޗު މުހައްމަދު އަހްމަދު ހޮވުނުއިރު ފެއާ ޕްލޭ ޓީމަކަށް ހޮވުނީ އަފީފުއްދީން ސްކޫލް އެވެ. މި މުބާރާތުގެ ތިން ވަނަ އަށް ހޮވުނީ ކެމްޕަސް އެވެ.