ހިރިމަރަދޫ ބަލިކޮށް ކުޅުދުއްފުށި ފައިނަލަށް

އެސްޓީއޯ މިނިވަން ޗެމްޕިއަންޝިޕްގައި މިއަދު ހަވީރު ކުޅުނު ފުރަތަމަ ސެމީ ފައިނަލު މެޗުގައި ހިރިމަރަދޫ 2-0 އިން ބަލިކޮށް ޓީމް ކުޅުދުއްފުށިން ފައިނަލުގެ ފުރަތަމަ ޖާގަ ކަށަވަރުކޮށްފި އެވެ.

ގިނަ އަދަދެއްގެ ސަޕޯޓަރުން ފޯރިނަގަމުން ދިޔަ މި މެޗުގައި ކުޅުދުއްފުށި ޓީމަށް ފުރަތަމަ ލަނޑު ޖަހައި ލީޑު ނަގައިދިނީ މުޅި މެޗުގައިވެސް މޮޅު ކުޅުމެއް ދެއްކި ހަސަން ޝާމިލް (މިލޭ) އެވެ. މިއީ މެޗުގެ 7 ވަނަ މިނެޓްގައި ހާފުގެ މެދަކާ ހިސާބުން އަރިމަތިން ލިބުނު ހިލޭ ޖެހުމަކުން އިބްރާހިމް ހަސަން (ކުޑަ އިއްބެ) ހުރަސް ކޮށްލި ބޯޅައެއް ފާ ޕޯސްޓްގައި ހުރި މިލޭ އެއްފަހަރުން ޖަހައި ކާމިޔާބުކުރި ވަރަށް ހިތްގައިމު ގޯލެކެވެ.

މި ލަނޑާއެކު ކުޅުދުއްފުށީ ޓީމުން ކައުންޓާ އެޓޭކް ގޭމެއްގައި ކުޅުނުއިރު ގިނައިރު ބޯޅަ ހިފަހައްޓައިގެން ކުޅެފައިވަނީ ހިރިމަރަދޫ ޓީމުންނެވެ. ނަމަވެސް ދެ ޓީމަށްވެސް ލަނޑު ޖަހާނެ މާ ރަނގަޅު ފުރުސަތެއް ލިބިފައެއް ނުވެ އެވެ. ނަމަވެސް ފުރަތަމަ ހާފުގައި ކުޑަ އިއްބެ ވަރަށް ހަނި އޭންގަލެއްގައި ހުރެ ފޮނުވާލި ހަމަލާ ފާހަގަކޮށްލެވެ އެވެ. މި ބޯޅަ އަމާޒުވީ ގޯލުގެ ހުރަސް ދަނޑިއަށެވެ.

ދެވަނަ ހާފު ފަށައިގެން ދެވަނަ ހާފުގެ 30 ވަނަ ސިކުންތުގައި ކުޅުދުއްފުށީ ޓީމުން ވަނީ ލީޑު ފުޅާކޮށްފަ އެވެ. މިއީވެސް ކުޑަ އިއްބެ ތަނަވަސް ކޮށްދިން ފުރުސަތެއްގައި ކާމިޔާބުކުރި ލަނޑެކެވެ. މިއީ ކުޑަ އިއްބެ ދެ ކުޅުންތެރިން ކައިރިން ނެއްޓުމަށްފަހު ގޯލު ކުރިމައްޗަށް ހުރަސްކޮށްލި ބޯޅައެއް އާސިފް ސަލީމް (އާސިއްޕެ) މުޅިން ހުސްކޮށްހުރެ ކާމިޔާބުކުރި ލަނޑެކެވެ.

މި ލަނޑާއެކު ކުޅުދުއްފުށީ ޓީމުން ޑިފެންސިވް ގޭމެއްގައި ކުޅެމުން ދިޔައިރު ހިރިމަރަދޫ ޓީމުން ވަނީ ގިނައިރު ގޭމް ކޮންޓްރޯލްކޮށް ހަމަލާތައް އުފެއްދޭތޯ މަސައްކަތް ކޮށްފަ އެވެ. މިގޮތުން ލިބުނު ކޯނަރެއްގައި ހިރިމަރަދޫ ކުޅުންތެރިޔަކު ބޮލުން ޖަހައި ފޮނުވާލި ބޯޅަ އަމާޒުވީ ގޯލުގެ ހުރަސް ދަނޑިއަށެވެ. ނަމަވެސް ކުޅުދުއްފުށީ ޓީމުން ވަނީ ވަރަށް ހުޝިޔާރުކަމާއެކު ޑިފެންސްކޮށް މެޗު ކާމިޔާބުކޮށްފަ އެވެ.

މާދަމާ މި މުބާރާތުގައި ކުޅޭ މެޗުގައި ބައްދަލުކުރާނީ 2016 ވަނަ އަހަރުގެ ޗެމްޕިއަން ހަނިމާދޫ އަދި 2015 ވަނަ އަހަރުގެ ޗެމްޕިއަން ނޮޅިވަރަމް އެވެ. މެޗު ފެށޭނީ 1545 ގަ އެވެ.