ޒޯން ފައިނަލުގެ ފުރަތަމަ ލެގު ކުޅުދުއްފުށި ކާމިޔާބުކޮށްފި

މިނިވަން ޗެމްޕިއަންޝިޕްގެ ޒޯން ފައިނަލުގެ ފުރަތަމަ ލެގު ކުޅުދުއްފުށީ ކާމިޔާބުކޮށް، ހިތްހަމަޖެހިލައިފި އެވެ.

މާރަންދޫގެ ހޯމް ދަނޑުކަމަށްވާ ހޯރަފުށީ ދަނޑު ކުޅުނު މިމެޗުގެ މާރަންދޫ އަތުން ކުޅުދުއްފުށީ މޮޅުވީ 2-0 އެވެ.

ގިނަ އަދަދެއްގެ ސަޕޯޓަރުންތަކެއް ކުރިމަތީގައި ކުޅުނު މިމެޗުގައި ކުޅުދުއްފުށިން ޖެހި 2 ގޯލްވެސް ޖަހާފައިވަނީ މެޗުގެ ފުރަތަމަ ހާފުގަ އެވެ. މެޗުގެ ފުރަތަމަ ގޯލް ޖަހާ ލީޑް ނަގައިދިނީ ހުސެއިން އަބުދުއްރަޝީދު (ބިގޭ) އެވެ. ބިގޭ ކީޕަރު ކައިރީން ނެޓުމަށް ފަހު ފޮނުވާލި ހިތްގައިމު ގޯލާއެކު ކުޅުދުއްފުށީ ޓީމަށް ދިރުން ލިބިގެންދިއަ އެވެ.

މެޗްގެ 29 ވަނަ މިނެޓްގައި އެ ޓީމްގެ 2 ވަނަ ގޯލް ކާމިޔާބުކޮށްދިނީ އިބްރާހިމް ހަސަން (ކުޑަ އިއްބެ) އެވެ.

ދެޓީމަށް ވެސް ދަނޑު ޖަހާނެ ފަހި ފުރުސަތުތަކެއް ލިބުނުކަމުގައިވިޔަސް އެ ފުރުސަތުތަކުގެ ބޭނުންވަނީ ހިފޭ ގޮތްނުވެފަ އެވެ. މެޗުގެ ދެ ވަނަ ހާފުގައި ގިނަ ވަގުތު ބޯޅަ ގެންގުޅި ނުރައްކާތެރި ހަމަލާތަކެއްވަނީ ދެ ޓީމުންވެސް އުއްފަދާފަ އެވެ.

ޒޯން ބުރުގެ މެޗުތައް ކުޅުމަށް ހަމަޖެހިފައި ވަނީ ހޯމް އެންޑް އަވޭ އުސޫލުންނެވެ. މިދެޓީމް ވާދަކުރާ ދެވަނަ ލެގްގެ މެޗް އޮންނާނީ މިމަހުގެ 11 ވަނަ ދުވަހު ކުޅުދުއްފުށީ ސްޓޭޑިއަމްގަ އެވެ.