އަހަރުތަކަކަށް ފަހު ހދ އަތޮޅު ތައުލީމީ މަރުކަޒަށް އާ އިމާރާތެއް

ޖާގައިގެ މައްސަލަ އިންތިހާއަށް ކުރިމަތިވެފައިވާ ހދ އަތޮޅު ތައުލީމީ މަރުކަޒުގައި 12 ކުލާސް ރޫމްގެ ހިމެނޭ ހަތަރު ބުރީގެ އިމާރާތެއް އަޅަން ވީ އަވާ އިންވެސްޓްމަންޓް ޕްރައިވެޓް ލިމިޓެޑްއާ ހަވާލުކޮށްފި އެވެ.

އެޑިއުކޭޝަން މިނިސްޓްރީގައި މިއަދު ބޭއްވި ރަސްމިއްޔާތުގައި މި އެއްބަސްވުމުގައި މިނިސްޓްރީގެ ފަރާތުން ސޮއި ކޮށްފައިވަނީ ސްޓޭޓް މިނިސްޓަރު އަހްމަދު ރިޔާޒް އެވެ. އަދި ވީ އަވާ އިންވެސްޓްމަންޓް ޕްރައިވެޓް ލިމިޓެޑްގެ ފަރާތުން ސޮއި ކުރީ އޮފީސް މެނޭޖާ ފާތިމަތު ލައިސާ ލަތީފް އެވެ.

އެ މަޝްރޫއުގެ ދަށުން ހދ. އަތޮޅު ތައުލީމީ މަރުކަޒުގައި 12 ކްލާސްރޫމް އަޅާ އަންނަ އަހަރުގެ ސެޕްޓެމްބަރުމަހު ބޭނުން ކުރާން ފަށާނެ ކަމަށް އެޑިއުކޭޝަން މިނިސްޓްރީން ބުންޏެވެ. މި ޕްރޮޖެކްޓު ހަވާލު ކުރި ކުންފުންނަށް 8 މިލިއަން ރުފިޔާ އަށް މަސައްކަތް ނިންމަން ދީފައިވަނީ އެއް އަހަރު ދުވަހުގެ މުއްދަތެކެވެ.

ހދ.ކުޅުދުއްފުށި ސުކޫލް (ހދ.އަތޮޅު ތަޢުލީމީ މަރުކަޒު) ގައި ޢިމާރާތްކުރުމަށް ހަމަޖެހިފައިވާ 12 ކްލާސްރޫމް 04 ބުރި އިމާރާތުގެ ކޮންޓްރެކްޓްގައި ސޮއި ކުރުން.@aisthly pic.twitter.com/Uvp2rCDDW5

— Ministry of Education (@MoEdumv) September 30, 2019

ހދ އަތޮޅު ތައުލީމީ މަރުކަޒަށް އާ އިމާރާތެއް ލިބިފައިމިވަނީ ޖާގައިގެ މައްސަލަ ހައްލުކުރަން މިނިސްޓްރީގައި އެދޭތާ އެތަކެއް އަހަރުތަކެއް ފަހުންކަން ފާހަގަކޮށްލެވެ. މީގެ ކުރިން އާ އިމާރާތް އަޅަން އެކި އަހަރު ބަޖެޓް ކުރެވުނު ނަމަވެސް އެ މަސައްކަތް ހަވާލުކުރެވިފައެއް ނުވެ އެވެ.

ހދ އަތޮޅު ތައުލީމީ މަރުކަޒަކީ ފައުންޑޭޝަން ގުރޭޑުން ފެށިގެން ގުރޭޑް 8 ކިޔަވައިދޭ ސްކޫލެކެވެ. މިއަހަރު އެ ސްކޫލުގައި 1400 އެއްހާ ދަރިވަރުން ދަނީ ތައުލީމް ހާސިލްކުރަމުންނެވެ.