ސްވިމަރސް ޑިވެލޮޕްމަންޓް ޕްރޮގުރާމެއް ކުޅުދުއްފުށީގައި ފަށައިފި

ސްވިމިންގ އެސޯސިއޭޝަން އާއި ކުޅުދުއްފުށީ ޒޯން ސްޓޭޑިއަމް ގުޅިގެން ކުޅުދުއްފުށީގައި ސްވިމަރސް ޑިވެލޮޕްމަންޓް ޕްރޮގުރާމް ފަށައިފި އެވެ.

ކުޅުދުއްފުށީ އާޓިފިޝިއަލް ބީޗުގައި މިކަމަށްޓަކާ މިއަދު ހެނދުނު ބޭއްވި ރަސްމިއްޔާތު ޝަރަފްވެރިކޮށްދެއްވީ، ސްވިމިންގ އެސޯސިއޭޝަންގެ ރައީސް މުހައްމަދު އަބުދުލް ސައްތާރެވެ.

މި ރަސްމިއްޔާތުގައި ސްވިމިންގ އެސޯސިއޭޝަންގެ ރައީސް މުހައްމަދު އަބުދުލް ސައްތާރު ވިދާޅުވީ، މި ޕްރޮގުރާމުގެ ސަބަބުން ގައުމީ ފެންވަރުގައި ފާހަގަކޮށްލެވޭ އެތުލީޓުންތަކެއް އުފެދިގެންދާނެކަމަށް އުންމީދުކުރައްވާ ކަމަށާ، ގައުމީ މުބާރާތްތަކުގައި ވާދަކޮށް ރަށާއި ގައުމަށް ރީތި ނަން ހޯދައިދިނުމަށް ދަރިވަރުންގެ ކިބައިން އޭނާ އެދިލެއްވި އެވެ.

މި ރަސްމިއްޔާތުގައި ވާހަކަދައްކަވަމުން ކައުންސިލްގެ ރައީސް އަބުދުލް ލަތީފް ހަސަން ވިދާޅުވީ، ސްވިމިންގ ޓްރެކްގެ ސަބަބުން ފެތުމުގެ ތަފާތު ޕްރޮގުރާމްތައް ފަށައިގަތުމަށް މަގުފަހިވެގެން ގޮސްފި ކަމަށާ އެހެން ކުޅިވަރުތައް ފަދައިން ކުރިއަށް އޮތްތަނުގައި މޫދު ކުޅިވަރުތަކުންވެސް ކުޅުދުއްފުށީގެ ނަން ފާހަގަކުރެވިގެންދާނެކަމަށް އުންމީދުކުރައްވާކަމަށް ވިދާޅުވި އެވެ.

"ހާއްސަކޮށް އެތުލެޓިކްސްގެ ދާއިރާގައި އަޅުގަނޑުމެންގެ އެތުލީޓުން ގައުމީ ޓީމުތަކުން ފެނޭ. އެހެންނަމަވެސް ސްވިމިންގގެ ދާއިރާގައި އަޅުގަނޑުމެންގެ ދަރިވަރުންގެ ހުނަރު ފެންނަ ލެއް މަދު. އެހެންވީމަ ކުރިއަށްއޮތްތަނުގައި އެކަންތައްތަކަށް މަގުފަހިވެގެންދާނެކަމަށް އުންމީދުކުރަން." ލަތީފް ވިދާޅުވި އެވެ.

ސްވިމިންގ ޓްރެކް ހަދިޔާކޮށްފައިވަނީ ޔޫތް މިނިސްޓްރީ އާއި ސްވިމިން އެސޯސިއޭޝަންގެ ވަރަށް ބޮޑު އެހީތެރިކަމާއެކު އެވެ. ލަތީފް ވިދާޅުވީ، ސްވިމިންގ ޓްރެކް ގާއިމުކުރުމަށް ކައުންސިލްގެ މާލިއްޔާއިން މިހާރަށްވެސް ގާތްގަނޑަށް 27000 ރުފިޔާ ހަރަދުކޮށްފައިވާ ކަމަށެވެ.

މި ޕްރޮގުރާމްގައި ބައިވެރިވި ދަރިވަރުންނާއި އޮފިޝަލުންގެ ކިޓް ސްޕޮންސަރކޮށްދީފައިވަނީ ބޭންކް އޮފް މޯލްޑިވްސް އިންނެވެ. އެތަކެތި އެފަރާތްތަކާ ހަވާލުކޮށްދެއްވީ، ބީއެމްއެލް ކުޅުދުއްފުށީ ބުރާންޗްގެ މެނޭޖަރު އައިޝަތު އަބުދުލްރަހީމާއި، ކައުންސިލް ރައީސް އަބުދުލް ލަތީފް ހަސަން އަދި އެސޯސިއޭޝަންގެ ރައީސް މުހައްމަދު އަބުދުލް ސައްތާރެވެ.

އާޓިފިޝިއަލް ބީޗް ސަރަހައްދު ތަރައްގީކުރުމަށް ކައުންސިލްގެ މިއަހަރުގެ ކަލަންޑަރުގައި ހިމެނިފައިވާ ކަމަށާއި އެގޮތުން އެ ސަރަހައްދު ތަރައްގީކުރުމަށް ގިނަ ކަންތައްތައް ކުރަން ހަމަޖެހިފައިވާކަމަށް ލަތީފް ވިދާޅުވި އެވެ. އެކަމަށް ކައުންސިލުން ބޮޑު ހޭދައެއްކުރާގޮތަށް މިއަހަރު ހަމަޖެހިފައިވާކަމަށް ލަތީފް ވިދާޅުވި އެވެ.

މި ޕްރޮގުރާމުގައި 11 އަހަރާއި 15 އަހަރާ ދެމެދުގެ އުމުރުގެ ދެ ޖިންސްގެ 58 ދަރިވަރުން ބައިވެރިވެ އެވެ. މި ޕްރޮގުރާމްގައި ދަރިވަރުން ހޮވާލާފައިވަނީ އެސޯސިއޭޝަނުން ކުރިއަށްގެންދިޔަ ޓެސްޓަކުންނެވެ. މިއީ 7 އަހަރުގެ މެދުކެނޑުމަކަށްފަހު ކުޅުދުއްފުށީގައި ކުރިއަށްގެންދާ މިފަދަ ފުރަތަމަ ޕްރޮގުރާމެވެ.

މި ރަސްމިއްޔާތުގައި ސްކޫލުތަކުގެ ވެރިންނާއި ސްޓޭޑިއަމްގެ ހިންގުމާ ހަވާލުވެ ހުންނެވި ޝައުފާ އިބުރާހިމް ހިލްމީގެ އިތުރު ކޯޗުންނާއި ބެލެނިވެރިން ބައިވެރިވި އެވެ.