އެއާ އިންޑާޔާގެ ފްލައިޓު ވެއްޓުމާއި ގުޅިގެން ރައީސް ތައުޒިޔާ ފޮނުވައިފި

ކޮވިޑް19 އާ ގުޅިގެން ދުބާއީގައި ތާށިވެފައި ތިބި އިންޑިއާގެ ރައްޔިތުން ގޮވައިގެން ކެރެލާއަށް ދަތުރުކުރި ބޯޓު ރަންވޭ މަތިން ކަހާލައިގެން ރޭ ހިނގި ހާދިސާއާ ގުޅިގެން ރައީސް އިބްރާހިމް މުހައްމަދު ސޯލިހު ތައުޒިޔާ ފޮނުއްވައިފިއެވެ.

އެ ހާދިސާއާ ގުޅިގެން ރައީސް ސޯލިހު ކުރެއްވި ޓުވީޓެއްގައި ވިދާޅުވީ، ފްލައިޓު ވެއްޓުނު ހަބަރު އެއްސެވީ ފުން ހިތާމައާއި އެކުގައި ކަމަށާއި އެ ހާދިސާގައި އަސަރުކުރި މީހުންނާއި އެމީހުންގެ އާއިލާތަކަށް ތައުޒިޔާ ފޮނުވާ ކަމަށެވެ.

Extremely saddened to hear of the Air India Express plane crash in Kerala on Friday evening. I offer my condolences to the families of those affected by this tragedy, and prayers for the ongoing recovery effort.

— Ibrahim Mohamed Solih (@ibusolih) August 8, 2020

އެއާ އިންޑިއާ އެކްސްޕްރެސްގެ ބޯއިން 737 މަރުކާގެ އެ މަތިންދާބޯޓު ކެރެލާއަށް ދިޔައީ ކޮރޯނާވައިރަހުގެ ސަބަބުން ދުބާއީގައި ތާށިިވި މީހުން ގޮވައިގެންނެވެ.

ބޯޓުގައި ކުޑަކުދިންނާއި ކްރޫ ހިމެނޭގޮތުން، 184 މީހުން ދަތުރުކުރިއެވެ. އަދި އެ ހާދިސާގައި 18 މީހަކު މަރުވެފައި ވާކަން އިންޑިއާގެ ކަމާބެހޭ ފަރާތްތަކުން ވަނީ ކަށަވަރުކޮށްދީފައެވެ. އޭގެ ތެރޭގައި ބޯޓުގެ ދެ ޕައިލެޓުން ވެސް ހިމެނެއެވެ.

ކާލިކަޓު އިންޓަނޭޝަނަލް އެއާޕޯޓުގައި އެބޯޓު ރޭ ފުރަތަމަ ޖައްސަން މަސަައްކަތް ކުރި ވަގުތު ބޯކޮށް ވާރޭ ވެހެމުން ދިޔުމުން ބޯޓު ޖެއްސޭ ގޮތެއް ނުވި އެވެ. އަދި ދެވަނަ ފަހަރު ޖައްސަން މަސައްކަތް ކުރުމުން ރަންވޭ މަތިން ކަހާލައިގެން ގޮސް، 35 ފޫޓު ތިރިއަށް ވެއްޓި، ދެ ފަޅިވީ އެވެ.

އިންޑިއާގެ ސިވިލް އޭވިއޭޝަން މިނިސްޓްރީން ވަނީ އެގައުމުގެ އެއާކްރާފްޓް އެކްސިޑެންޓް އިންވެސްޓިގޭޝަން ބިއުރޯއިން އެ މައްސަލަ ތަހުގީގު ކުރާނެ ކަމަށް ބުނެފަ އެވެ.