ހުރިހާ ރަށެއްގައި މިމަހު 7 ވަނަ ދުވަހުން ފެށިގެން މާސްކް އަޅަން ޖެހޭގޮތަށް ހަމަޖައްސައިފި

މީހުން ދިރިއުޅޭ ހުރިހާ ރަށެއްގައި މި މަހު 7 ވަނަ ދުވަހުން ފެށިގެން މާސްކް އެޅުން މަޖުބޫރުކޮށް، އެކަން ހެލްތް ޕްރޮޓެކްޝަން އެޖެންސީން އާންމުކޮށްފި އެވެ.

ކޮވިޑް-19 ގެ ހާލަތު ގޯސްވަމުންދާތީ، ބަލި ކޮންޓްރޯލު ކުރަން އަޅާ ފިޔަވަޅެއްގެ ގޮތުން މާސްކު އެޅުން މަޖުބޫރުކޮށް އެކަން ތަންފީޒުކުރަން ފަށަން ހަމަޖައްސާފައިވަނީ މިމަހު 7 ވަނަ ދުވަހުން ފެށިގެންނެވެ. އެގޮތުން ޑިރެކްޓާ ޖެނެރަލް އޮފް ޕަބުލިކް ހެލްތް މައިމޫނާ އަބޫބަކުރު ސޮއިކުރައްވާ މިއަދު ނެރުނު އެންގުމުގައި ބުނެފައިވަނީ މިމަހުގެ 7 ވަނަ ދުވަހުން ފެށިގެން ވަކިގޮތެއް އަންގަންދެން މީހުން ދިރިއުޅޭ ހުރިހާ ރަށެއްގައި ގެއިން ބޭރުގައި އުޅޭއިރު އަނގަޔާއި ނޭފަތާއި ދަތްދޮޅި ނިވާވާގޮތަށް މާސްކު އެޅުމަށް އަންގާ ކަމަށެވެ.

ފިޔަވަޅުތައް ހަރުދަނާ ކުރަން ނިންމާފައިމިވަނީ މާލެ ފިޔަވައި ރާއްޖޭގެ އެހެން ބައެއް ރަށްރަށުންވެސް ކޮވިޑް-19ގެ ކޮމިޔުނިޓީ ކޭސްތަކެއް ފެންނަމުންދާތީ އެވެ. އެގޮތުން ގއ. ދެއްވަދުއިން ކޮވިޑް ކޭސްއެއް ފެނި އެ އަތޮޅުގެ ބައެއް ރަށްރަށުން ވަނީ އެއާ ގުޅުންހުރި ކޭސްތައް ފެނިފަވެ އެވެ. އަދި އިތުރުން މ. ކޮޅުފުއްޓާއި ހއ. މުރައިދޫ އަދި އއ. މަތިވެރިންވެސް ކޭސްތަކެއް ފެނި އެ ރަށްތައް ވަނީ މޮނިޓަރިންގަ އެވެ.

އެ ފިޔަވަޅުތައް ތަންފީޒުކޮށް ފުރިހަމައަށް އަމަލުކުރުމަށް ހުރިހާ އިދާރާތަކަށްވެސް ވަނީ އަންގާފަ އެވެ. އަދި އެ އެންގުމާ ގުޅިގެން ދައުލަތުގެ ކަމާބެހޭ މުއައްސަސާތަކުން އަދާކުރަންޖެހޭ ޒިންމާތައް އަދާކުރުމުގެ ގޮތުން އަޅާ ފިޔަވަޅުތަކާއި ދޭ އިރުޝާދުތަކާ އެއްގޮތަށް އަމަލުކުރުމަށް ހުރިހާ ފަރާތްތަކަށްވެސް ވަނީ އަންގާފަ އެވެ.

ނަމަވެސް ވަކި ހާލްތަތަކުގައިވާ ފަރާތްތައް ގެއިން ބޭރުގައި އުޅޭއިރު މާސްކު އެޅުމުން އިސްތިސްނާވާނެ ކަމަށް އެޗްޕީއޭގެ އެންގުމުގައި ބުނެފައިވެއެވެ.

މާސްކު އެޅުމުން އިސްތިސްނާވާ ފަރާތްތައް

ރާއްޖޭގައި ކޮވިޑުގެ އަދަދުތައް މިދިޔަ ހަފުތާއިން ފެށިގެން ދުވާލެއްގެ މައްޗަށް އުޅެނީ 100 އިން މަތީގައެވެ. އިއްޔެ އެކަނިވެސް ރާއްޖެއިން ވަނީ 215 މީހަކު ޕޮޒިޓިވްވެފައެވެ.