ކޮވިޑް ޖެހިގެން 28 މީހަކަަށް ފަރުވާ ދެނީ

ކޮވިޑް-19 އަށް ޕޮޒިޓިވް 28 މީހަކަަށް އެޑްމިޓް ކޮށްގެން ފަރުވާ ދެމުންދާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.

ރާއްޖެއިން މިހާތަނަށް 184،302 މީހަކަށް ވަނީ ކޮވިޑް ޖެހިފައެވެ. އޭގެ ތެރެއިން 307 މީހަކު ވަނީ މަރުވެފައެވެ.

އެޗްޕީއޭ އިން މިއަދު ބުނީ ޖުލައި 17 އިން 23 ގެ ނިޔަލަށް 394 މީހަކަަށް ބަލި ޖެހިފައިވާ ކަމަަށެވެ. އެއީ އަތޮޅުތަކުން ޕޮޒިޓިވްވީ 236 މީހަކާއި މާލެ ސަރަހައްދުން ޕޮޒިޓިވްވީ 69 މީހެކެވެ. ރިސޯޓްތަކާއި ސިނާއީ މަސައްކަތް ކުރާ ރަށްތަކުންވެސް 89 މީހަކަަށް ވަނީ ބަލިޖެހިފައެވެ.

މިދިޔަ ދުވަސްތަކުގައި ކޮވިޑަށް ޕޮޒިޓިވްވާ މީހުންގެ އަދަދު ވަރަށް ބޮޑަށް އިތުރު ވެފައިވީނަމަވެސް އެ އަދަދު ދަނީ މިހާރު ދަށްވަމުންނެވެ. ޖޫން މަހުގެ 19 އިން 25 އަށް 1،202 މީހަކަށް ބަލި ޖެހުނެވެ. ޖޫން 26 އިން ޖުލައި ދެވަނަ ދުވަހުގެ ނިޔަލަށް 1،134 މީހަކަށް ބަލި ޖެހުނެވެ. އަދި ޖުލައި ތިންވަނަ ދުވަހުން ފެށިގެން ނުވަވަނަ ދުވަހާ ހަމައަށް 771 މީހަކަށް ބަލި ޖެހުނެވެ.