ގިނަ އަދަދެއްގެ ޓީޗަރުން ކޮވިޑަށް ޕޮޒިޓިވްވެ، އޭއީސީ ބައެއް ގްރޭޑްތަކުގެ ކިޔެވުން މެދުކަނޑާލައިފި

ހދ. އަތޮޅު ތައުލީމީ މަރުކަޒު (އޭއީސީ)ގައި ކިޔަވައިދެމުން އަންނަ ގިނަ ޓީޗަރުންތަކެއް ކޮވިޑް-19 އަށް ޕޮޒިޓިވްވުމާއި ގުޅިގެން އެ ސްކޫލުގެ ބައެއް ގްރޭޑް ތަކުގެ ކިޔެވުން މެދުކަނޑާލައިފި އެވެ.

މާދަމާ އިން ފެށިގެން ވަގި ގޮތެއް އަންގަންދެން ކިޔެވުން މެދުކަނޑާލާފައިވަނީ އެ ސްކޫލުގެ ގްރޭޑް 1 ން 6 ގެ ދަރިވަރުންގެ އިތުރުން ސަންޝައިން އަދި ފައުންޑޭޝަން ގުރޭޑް ތަކަށެވެ.

ސްކޫލުން ބުނީ ކިޔެވުން މެދުކަނޑާލަން ޖެހުނީ ގިނަ ޓީޗަރުންތަކެއް ކޮވިޑް-19 އަށް ޕޮޒިޓިވްވެ ކަރަންޓީނުވާން ޖެހުމާއި ގުޅިގެން ކަމުގަ އެވެ.

މިހާރު ކުޅުދުއްފުށީގައި ހަލުވިކަމާއި އެކު ކޮވިޑް ފެތުރެމުން އަންނައިރު ބަލިޖެހިފައިވާ 510 މީހުން އެބަ ތިއްބެވެ.

ކޭސްތައް ފެނި ރަށް މޮނީޓަރިންގައި އޮތްނަމަވެސް މިފަހަރު ވަނީ އަޅާފައިވާ ފިޔަވަޅުތަކަށް ވަރަށް ބޮޑެތި ލުއިތަކެއް ދީފައެވެ. މިއާއި އެކު ރައްކާތެރިކަމުގެ ގޮތުން ފަރުދީ ޒިންމާ އަދާކޮށް ރައްކާތެރިވުމަށް ވަނީ އިލްތިމާސްކޮށްފަ އެވެ.