ކޮވިޑް ޖެހިގެން މަރުވި މީހުންގެ އަދަދު 289 އަރައިފި

ކޮވިޑް ޖެހިގެން ރާއްޖޭން މަރުވި މީހުންގެ އަދަދު 289 އަރައިފި އެވެ.

ކޮވިޑް ޖެހިގެން އިއްޔެ އޭޑީކޭގައި ފަރުވާ ދެމުން ދިޔަ 81 އަހަރުގެ އަންހެނަކު މަރުވެފައިވާއިރު މިއީ މިމަހުގެ ތެރޭގައި މި ބަލީގައި މަރުވި 12 ވަނަ މީހާއެވެ.

މި ބަލީގައި ހޮނިހިރު ދުވަހުވެސް ރާއްޖެއިން މީހަކު މަރުވެފައިވެއެވެ. އެއީ ހުޅުމާލެ މެޑިކަލް ފެސިލިޓީގައި ފަރުވާހޯދަމުން ދިޔަ 72 އަހަރުގެ ފިރިހެނެކެވެ.

މިވަގުތު ރާއްޖޭގައި ބަލި ޖެހިފައި ތިބީ 16227 މީހުނެވެ. އަދި އެންމެ ފަހުން ބައްޔަށް ޕޮޒިޓިވްވީ 986 މީހުނެވެ.

މިދިޔަ މަހުން ފެށިގެން ރާއްޖޭގައި ވަނީ ރިކޯޑް އަދަދަކަށް މީހުން ޕޮޒިޓިވްވެފައެވެ. އެއާއެކު މި ބަލީގައި މަރުވި މީހުންގެ އަދަދުވެސް މިއަހަރުވަނީ އިތުރުވެފައެވެ