ރައީސް ޔާމީން ގެއަށް ބަދަލުކޮށްފި

މަނީ ލޯންޑަރީގެ ކުށް ސާބިތުވެ 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ އިދިކޮޅު ކޯލިޝަންގެ ލީޑަރު އަދި ކުރީގެ ރަައީސް އަބްދުﷲ ޔާމީން އަބްދުލް ގައްޔޫމް ގެއަށް ބަދަލުކޮށްފިއެވެ.

ކަރެކްޝަނަލް ސާވިސްގެ ބެލުމުގެ ދަށުން ރައީސް ޔާމީން މާލެ ގެނެސްފައި ވަނީ މިއަދު 3:25 ގައެވެ.

އެމަނިކުފާނު ގެންނެވި ވަގުތު ސަޕޯޓަރުން ވަނީ އެއް ނަމްބަރު ޖެޓީ ސަރަަހައްދަށް އެއްވެފައެވެ. އަދި އެމަނިކުފާނު ގެކޮޅު ސަރަހައްދުގައިވެސް އެމަނިކުފާނުގެ ގިނަ އަދަދެއްގެ ސަޕޯޓަރުން ދަނީ ހަރަކާތްތެރިވަމުންނެވެ.

ޔާމީން ގެއަށް ބަދަލުކުރަން ނިންމީ އިއްޔެ ބޭއްވި ރިޔާސީ އިންތިހާބު ޕީޕީއެމް/ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު ކާމިިޔާބު ކުރެއްވުމުންނެވެ. އެނގިފައިވާ ގޮތުގައި ސިއްހީ ސަބަބުތަކަށްޓަކައި ގެއަށް ބަދަލު ކޮށްދިނުމަށް އެމަނިކުފާނު ވަނީ މީގެ ދެ ހަފުތާއެއްހާ ދުވަސް ކުރިން އެދިވަޑައިގެންފަ އެވެ.

އިންތިހާބުގެ ބޮޑު ކާމިޔާބީއަށް ފަހު ފުރަތަމަ ފަހަރަށް ސަޕޯޓަރުންނާއި މީޑިއާއާ ބައްދަލު ކުރައްވައި މުއިއްޒު ރޭ ވަނީ ޔާމީން ގެއަށް ބަދަލުކޮށްދިނުމަށް ސަރުކާރަށް ގޮވާލައްވައިފަ އެވެ.

އިންތިހާބީ ރައީސް ޑރ. މުހައްމަދު މުއިއްޒު ވިދާޅުވި ގޮތުގައި ރައީސް ސޯލިހު އެ ގޮތަށް ނިންމެވީ މިވަގުތު ގައުމުގެ މަސްލަހަތަށް ބައްލަވާފަ އެވެ. ރައީސް ސޯލިހު އާއި ޑރ. މުއިއްޒު އިއްޔެ ރައީސް އޮފީހުގައި ބައްދަލު ކުރެއްވި އެވެ.

"އަޅުގަނޑުވެސް ރައީސް އިބްރާހިމް މުހައްމަދު ސޯލިހާ ބައްދަލުކޮށްފަ މިއައީ ދެއްވި ފުރުސަތުގަ. މިކަން ފާހަގަކޮށް އަޅުގަނޑު ދެންނެވިން މިވާހަކަ. މި ގައުމުގެ ރައްޔިތުން ބަސް އިއްވީމާ އެކަމުގެ ހަމަ ގޮތް ނިންމެވީ ކަމަށް ގައުމުގެ މަސްލަހަތު އިސްކުރައްވާފައި،" ރައީސް ޔާމީން މަރުހަބާ ކިޔުމަށް އެ މަނިކުފާނު ދިރުއުޅުއްވާ ހ. ދޫވެހި ކައިރިއަށް އެތައް ސަތޭކަ ސަޕޯޓަރުން ޖަމާވެފައިވަނިކޮށް އެ ސަރަހައްދަށް ވަޑައިގެން މީޑިއާތަކާ ވާހަކަ ދައްކަވަމުން މުއިއްޒު ވިދާޅުވި އެވެ.

އެމަނިކުފާނު ވިދާޅުވީ މިއީ އަމިއްލަ މަސްލަހަތަށް ވުރެ ގައުމުގެ މަސްލަހަތު އިސްކުރަންވީ ވަގުތު ކަމަށާއި، މިވަގުތަކީ އެންމެން އެކަތިގަނޑަކަށް ވާންވީ ވަގުތު ކަމަށެވެ.

"ސަރުކާރުން ރައީސް ޔާމީން ގެއަށް ދޫކޮށްލަށް ނިންމި ނިންމުމަކީ އަޅުގަނޑު ވަރަށް ބަލައިގަންނަ ވަރަށް އެކަމަށްޓަކާ ފަހުރުވެރިވާ ކަމެއް، ޝުކުރުވެރިވާ ކަމެއް،" މުއިއްޒު ވިދާޅުވި އެވެ.

ގައުމުގައި މިވަގުތު ހުރި މައްސަލަތައް ހައްލުކުރުމަށް ރައީސް ޔާމީންގެ ލަފާފުޅު ބޭނުންތެރި ކަމެއް ކަމަށް މުއިއްޒު ވިދާޅުވި އެވެ. މުޅިން މިނިވަން ނުވެ ޔާމީން ގޭގައި ހުންނެވުމަކީ ގާނޫނުގެ ތެރެއިން ވެސް ހަމަތަކެއް ކަނޑައެޅިފައިވާނެ ކަމެއްކަން ފާހަގަކުރައްވަމުން މުއިއްޒު ވިދާޅުވީ، އެކަމަކު ވެސް އެމަނިކުފާނުގެ ލަފާ ހޯއްދަވާނެ ކަމަށެވެ.

ރައީސް ޔާމީން ގެއަށް ބަދަލުކުރި ވަގުތު އެތަނުގައި ތިބި މީހުން ވަނީ އެމަނިކުފާނު މިނިވަންކުރުމަށް އަޑުހަރުކޮށް ގޮވާފަ އެވެ.

މޯލްޑިވްސް ކަރެކްޝަނަލް ސާވިސް އިން މިއަދު ބުނީ ރައީސް ޔާމީން ގެއަށް ބަދަލުކުރީ ވަގުތީގޮތުންނެވެ.