ފާފު މަޝްރޫއު ހުއްޓުވި މީހުން ރަސްމާލެ މަޝްރޫއަށް ބަހެއް ނުބުނާތީ ޔާމީންގެ ނުރުހުން

ކުރީގެ ރައީސް އަބްދުﷲ ޔާމީންގެ ވެރިކަމުގައި ފ. އަތޮޅުގައި ހިންގަން އުޅުނު ބިޔަ މަޝްރޫއު ހުއްޓުވި ފަރާތްތަކުން ރަސްމާލެ މަޝްރޫއާ ދެކޮޅަށް ބަހެއް ނުބުނާ ކަމަށް ވިދާޅުވެ ޔާމީން ނުރުހުން ފާޅު ކުރައްވައިފި އެވެ.

ޕީއެންއެފްގެ ފްރަންޓް އޮފީސް ޖަލްސާގައި ރޭ ވާހަކަ ދައްކަވަމުން ޔާމީން ވިދާޅުވީ އެމަނިކުފާނުގެ ވެރިކަމުގައި ފ. އަތޮޅު ހިމިތީގައި ސައުދީ އަރަބިއްޔާގެ ބޮޑު މަޝްރޫއެއް ގެންނަން މަސައްކަތް ކުރެއްވި ކަމަށާއި އެއީ ގާތްގަނޑަކަށް 10 ބިލިއަން ޑޮލަރުގެ މަޝްރޫއެއް ކަމަށެވެ.

އެ މަޝްރޫއު ކުރިޔަށް ދިޔަ ނަމަ އެތަނުގައި ވަޒީފާގައި އުޅޭނީ ދިވެހިން ކަމަށާއި އެއީ އިސްލާމީ އެންމެ ބޮޑު ލީޑާޝިޕް އޮތް ގައުމާއެކު ކުރެވުނު މަސައްކަތެއް ކަމަށް ޔާމީން ވިދާޅުވި އެވެ.

ނަމަވެސް އެއީ ފ. އަތޮޅު ވިއްކާލުން ކަމަށް ބުނެ އިދިކޮޅު ފަރާތްތަކާއި ކުރީގެ ރައީސުން އަޑުގަދަ ކުރި އިރު މިހާރު ރަސްމާލޭގެ އެއްބައި އެއްކޮށް ދޫކޮށްލަން އުޅޭ އިރު ބަހެއް ނުބުނަނީ ކީއްވެގެންތޯ ޔާމީން ސުވާލު އުފެއްދެވި އެވެ.

"އަޅުގަނޑު ހިތަށް އަރަނީ ޔަހޫދީކަން ބޮޑެއް ނޫންހޭ މި މީހުންގެ. މިހާރު ޔަހޫދީންނަށް މި ބިން ދޫކޮށްލާއިރު އަޅުގަނޑޫމެންގެ ފައިސާ އިން ހިއްކަމުންދާ ބިމެއް މި ދޫކޮށްލަނީ." ޔާމީން ވިދާޅުވި އެވެ.

ޔާމީން ވިދާޅުވި ގޮތުގައި ފ. އަތޮޅުގައި އެ މަޝްރޫއު ހިންގަން އުޅުނީ ފަޅެއްގަ އެވެ. ރަސްމާލެއަކީ ދިވެހިންގެ ފައިސާ އިން އެތައް ބިލިއަނެއް ހަރަދު ކޮށްގެން ހިއްކަމުންދާ ތަނެކެވެ.

"އޭރު ބޮޑު ސިންގާ ކަމަަކަށް ހަދައިގެން އުޅުނު މީހުން މިހާރަކު ބަހެއް ނުބުނޭ." ޔާމީން ވިދާޅުވި އެވެ.

ރަސްމާލެގައި މަޝްރޫއު ހިންގާ އީގަލްސް ހިލްސް އަކީ ޔޫއޭއީގެ ކުންފުންޏެކެވެ.

ޔޫއޭއީއަކީ އިޒްރޭލާ ވަރަށް ގާތް ގުޅުމެއް ބާއްވާ ގައުމަކަށް ވާތީ ޔާމީން މުޅި މަޝްރޫއަށް ފާޑު ވިދާޅުވީ އެކަމާ ގުޅުވައިގެންނެވެ.

އެގޮތުން މި މަޝްރޫއުގެ ނަތީޖާއަކަށް ވާނީ މާލެ ކައިރިން ޔަހޫދީންނަށް ބިން ވިއްކުން ކަމަށް ވެސް ޔާމީން ވިދާޅުވި އެވެ. ނަމަވެސް އެކަމާ ރާއްޖޭގެ ދީނީ އިލްމުވެރިން ކަންބޮޑުވުން ފާޅު ކުރާ ތަން ނުފެންނަ ކަމަށް ވެސް އެމަނިކުފާނު ވިދާޅުވި އެވެ.