ޔާމީންގެ ޝަރީއަތް ލައިވްކުރަން ނިންމައިފި

ވ. އާރަށް ކުއްޔަށް ދިން މައްސަލައިގައި ކުރީގެ ރައީސް އަބްދުﷲ ޔާމީންގެ މައްޗަށް ކުރާ ކޮރަޕްޝަންގެ ދައުވާތަކުގެ ޝަރީއަތް ލައިވް ކުރަން ކްރިމިނަލް ކޯޓުން މިއަދު ނިންމައިފި އެވެ.

ހިޔާނާތްވެ، އެ ފައިސާ ލޯންޑާކުރުމުގެ ކުށް ސާބިތުވާ ކަމަށް ކަނޑައަޅައި، ޔާމީންގެ މައްޗަށް 11 އަހަރުގެ ޖަލު ހުކުމެއް ދަށު ކޯޓުން އިއްވީ މިދިޔަ ޑިސެމްބަރު 25، 2022 ގައެވެ.

އޭގެ ފަހުން، ވެރިކަން ބަދަލުވެ މި އަހަރުގެ އޭޕްރީލް 18 ގައި ހައިކޯޓުން ވަނީ ދަށު ކޯޓުގެ ހުކުމް ބާތިލުކޮށް ޔާމީން މިނިވަންކޮށްފައެވެ. އެ މައްސަލައިގައި ދެން ހިމެނޭ ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެންބަރު ޔޫސުފް ނައީމް ވެސް އެ ކޯޓުން މިނިވަންކުރިއެވެ. ނަމަވެސް ފަހުން ހައި ކޯޓުން ވަނީ އެ ހުކުމް ބާތިލުކޮށް މައްސަލަ އަލުން ބަލަން ކްރިމިނަލް ކޯޓަށް އަންގައިފަ އެވެ. އެ މައްސަލައިގެ ޝަރީއަތް ލައިވް ކުރަން ނިންމީ މައްސަލަ އަލުން ބަލަން ފަށައި މިއަދު ބޭއްވި ފުރަތަމަ އަޑުއެހުމުގަ އެވެ.

ޔާމީނަށް އިއްވި ޖަލު ހުކުމް ބާތިލްކޮށް ކްރިމިނަލް ކޯޓަށް ތަހުވީލުކޮށްފައިވާ މައްސަލާގައި މިއަދު ބޭއްވި ފުރަތަމަ އަޑުއެހުމުގައި އޮތީ ޝަރީއަތް ކުރިއަށް ގެންދިއުމަށް ދައުލަތާއި ޔާމީންގެ ފަރާތުން ފެންނަ ކަންކަން ހުށަހަޅައި އެ ކަންކަމާ މަޝްވަރާކޮށް ގޮތެއް ނިންމުމެވެ.

އިދާރީ އަޑުއެހުމެއްގެ ގޮތުގައި ބޭއްވި އެ އަޑުއެހުމުގައި ޔާމީންގެ ވަކީލު ހަމްޒާ ލަތީފު ވިދާޅުވީ މީގެ ކުރިން ވެސް ޔާމީންގެ މައްޗަށް ހިންގި ޝަރީއަތެއް ވަގުތުން ދުރަށް ދައްކާފައިވާތީ މި ޝަރީއަތް ވެސް ލައިވްކޮށްދިނުމަށް އެދިވަޑައިގަންނަވާ ކަމަށެވެ.

މި މައްސަލަ ބައްލަވާ ގާޒީ އަލީ ނަދީމް ނިންމެވީ، ދެން އޮންނަ އަޑުއެހުންތައް ލައިވްކޮށް ކުރިއަށް ގެންދިއުމަށެވެ. އަދި އަންނަ މަހުގެ 16 ވަނަ ދުވަހު ޝަރީއަތުގެ އަޑުއެހުމެއް ބޭއްވުމަށް ވެސް ނިންމެވިއެވެ.

ގއ. ވޮޑަމުއްލާގެ އެއް މިލިއަން ޑޮލަރު ލޯންޑާ ކުރިކަން ސާބިތުވެ ޔާމީނަށް އިއްވި ފަސް އަހަރުގެ ހުކުމާ ގުޅިގެން އެމަނިކުފާނު ގިނަ ދުވަސްތަކެއް ވަންދެން ޖަލުގައި އޮންނެވިއެވެ. ކްރިމިނަލް ކޯޓުން ޑިސެމްބަރުގައި 2019 ގައި ކުރި ހުކުމް ހައި ކޯޓުން ދެމެހެއްޓި ނަމަވެސް ސުޕްރީމް ކޯޓުން ހުކުމް ބާތިލް ކުރުމުން އެމަނިކުފާނު މިނިވަންކޮށްފައި ވަނީ ދެ އަހަރު ފަހުން 2021 ގައެވެ.

އާރަށް މައްސަލައިގެ އިތުރުން ރ. ފުއްގިރި ކުއްޔަށް ދިނުމުގެ ހިޔާނާތާ ގުޅިގެން ވެސް ޔާމީންގެ މައްޗަށް ދައުވާ ކުރެއެވެ. އެމައްސަލަ އޮތީ ކްރިމިނަލް ކޯޓުގައެވެ.