33 ކޯހާއެކު ޤައުމީ ޔުނިވާސިޓީ ކުޅުދުއްފުށީ ކެމްޕަހުގައި ފެބްރުވަރީ 2025 އިންޓޭކަށް ހުޅުވާލައިފި

ކޮންމެ އަހަރަކު ވެސް ދެ ފަހަރު ދިވެހިރާއްޖޭގެ ޤައުމީ ޔުނިވާސިޓީގައި ކޯސްތަކަށް އިއުލާންކުރާއިރު، މި ފެށޭ 2025 ވަނަ އަހަރުގެ ފެބްރުވަރީ އިންޓޭކަށް މިހާރުވަނީ ކޯހަށް ވަނުމުގެ ފުރުސަތު ހުޅުވާލާފައެވެ.

އެގޮތުން ކުޅުދުއްފުށީ ކެމްޕަހުގައިވެސް މި އިންޓޭކަށް 7 ފެކަލްޓީއަކުން، ޖުމްލަ 33 ކޯހަކަށް ވަނުމުގެ ފުރުސަތު ވަނީ ހުޅުވާލާފައިވާއިރު ކިޔަވައިދިނުމުގެ ދާއިރާއިންނާއި، ނަރުސްކަމުގެ ދާއިރާ އަދި ވިޔަފާރިވެރިކަމުގެ ދާއިރާއިން އެކި ލެވެލްތަކުގެ ކޯސްތައް މީގެ ތެރޭގައި ހިމެނެއެވެ. މީގެ އިތުރުން އެންޖިނިއަރިންގ އަދި ސައިންސް އެންޑް ޓެކްނޮލޮޖީގެ ދާއިރާއިންނާއި ޝަރީއާ އެންޑް ލޯ އަދި ހޮސްޕިޓާލިޓީ ދާއިރާއިން މި ކެމްޕަހުން ކިޔެވުމުގެ ފުރުސަތު ވަނީ ފަހިވެފައެވެ.

އަދި ފައުންޑޭޝަން ލެވެލުން ފެށިގެން ކިޔެވުމުގެ މަތީ ހަރުފަތްތަކަށް ވާސިލުވާން ބޭނުންވާ ފަރާތްތަކަށް އަމާޒުކުރެވިގެން 7 ކޯހެއް ހިންގުމަށް ހަމަޖެހިފައި ވެއެވެ.

ކުޅުދުއްފުށި ކެމްޕަހުގައި 2025ވަނަ އަހަރު ފެބުރުވަރީ އިންޓޭކްގައި ހިންގުމަށް ހަމަޖެހިފައިވާ ކޯސްތައް

ފެކަލްޓީ އޮފް އެންޖިނިއަރިންގ ސައިންސް އެންޑް ޓެކްނޮލޮޖީގެ ފަރާތުން މި ކެމްޕަހުގައި އަލަށް ފަށާ 4 ކޯހެއް.

1. އެޑްވާންސް ސެޓްފިކެޓް އިން ހޯޓިކަލްޗަރ: މިއީ މޭވާ އަޅާ ގަހާއި، ތަރުކާރީ އަޅާ ގަހާއި އަދި މާގަސް ހައްދައި ބަލަހައްޓަން ދަސްކޮށްދޭ ކޯހެކެވެ. މިކޯހުން ލިބޭނެ މަޢުލޫމާތުގެ ތެރޭގައި، ގަހަށް ދިމާވާ އެކި ކަހަލަ ބަލިތަކާއި ހެދިބޮޑުވުމުގެ މައްސަލަތައް ޙައްލުކުރާނެ ގޮތާއި، ޕޮޓުގައި ގަސް އިންދުމާއި، ގަސްކާނާއާއި ވެލި ތައްޔާރުކުރާނެ ގޮތާއި، ފާޓިލައިޒަރ އަދި ޕެސްޓިސައިޑްއާއި ބެހޭ މަޢުލޫމާތާއި އަދިވެސް ގަސް ބެލެހެއްޓުމުގައި ކުރަންވީ ތަފާތު ކަންކަމާއި ގަސް ބޭނުންކޮށްގެން ބިނާވެށި ޒީނަތްތެރިކުރާނެ ގޮތްތައް ދަސްވާނެއެވެ.

2. އެޑްވާންސް ސެޓްފިކެޓް އިން އެންވަޔަރމެންޓަލް މެނޭޖަމަންޓް: މިއީ އިންސާނުންގެ ޙަރަކާތްތަކުގެ ސަބަބުން ތިމާވެއްޓާއި ގުދުރަތީ ވަޞީލަތްތަކަށް ކުރާ އަސަރާއި އަންނަ ބަދަލުތައް ދެނެގަނެ އެކަންކަން މެނޭޖުކުރާނެ ގޮތް ދަސްކޮށްދޭ ކޯހެކެވެ. މިގޮތުން، ކުނި މެނޭޖުކުރުމާއި، ތިމާވެށި ތަޣައްޔަރުވާ ސަބަބުތަކާއި އޭގެ ޙައްލާއި، އަދި ދިރޭތަކެތީގެ ވެށި ރައްކާތެރިކުރުމާއި ދިރުންތަކުގެ ސިންދަފާތާއި ބެހޭ މަޢުލޫމާތު ފޯރުކޮށްދެވޭނެއެވެ. އަދި ތިމާވެއްޓަށް ނޭދެވޭ އަސަރުކުރުން ކުޑަވާނެހެން ދެމެހެއްޓެނިވިކޮށް ކަންކަން ކުރާނެ ގޮތް ދަސްކޮށްދެވޭނެއެވެ.

3. އެޑްވާންސް ސެޓްފިކެޓް އިން ޕޯލްޓްރީ ފާމިންގ: މިއީ ކުކުޅާއި އަސްދޫނިފަދަ ގެވެށި ދޫނި އާލާކޮށް އެތަކެތީގެ މަންފާ ހޯދުމުގެ ޢިލްމީ ގޮތްތައް ދަސްކޮށްދޭ ކޯހެކެވެ. މިގޮތުން މިފަދަ ދޫނިތައް ގެންގުޅޭއިރު ސަމާލުވާންޖެހޭނެ ސިއްޙީ އާދަތަކާއި، އެތަކެއްޗަށް ދިމާވާ ސިއްޙީ މައްސަލަތަކާއި، ދޫނިތައް ބެލެހެއްޓުމުގައި ކަންކުރަންވީ ގޮތް (މިސާލަކަށް، ކާން ދިނުމާއި، އުޅޭ ވެށި ތައްޔާރުކުރާނެ ގޮތްފަދަ ކަންކަން) ދަސްކޮށްދެވޭނެއެވެ.

4. އެޑްވާންސް ސެޓްފިކެޓް އިން މަޝްރޫމް ކަލްޓިވޭޝަން: މިއީ ކެއުމަށާއި ބޭސްވެރިކަމަށް ބޭނުންކުރާނެ މަޝްރޫމް ހައްދާ ބޮޑުކޮށް ބަލަހައްޓާ އަދި އެއިން މާލީ ނަފާ ހޯދާނެ ގޮތްތައް ދަސްކޮށްދޭ ކޯހެކެވެ. މިގޮތުން، މިބާވަތް އާލާކޮށް ދިރުވާނެ ގޮތްތައް ދަސްކޮށްދެވޭނެއެވެ. އަދި އެތަކެތި މާކެޓްކޮށް އެއިން ޢާމްދަނީ ހޯދިދާނެ ގޮތްތައް ބުނެދެވޭނެއެވެ.

ފެބްރުވަރީ 2025 އިންޓޭކަށް ހުޅުވާލެވިފައިވާ ކޯސްތަކާއި ބެހޭ މައުލޫމާތު: https://courses.mnu.edu.mv/course

މިހާރު އިއުލާން ކުރެވިފައިވާ ހުރިހާ ކޯހަކަށް ވެސް ވަނުމުގެ ސުންގަޑިއަކީ 23 ޖަނަވަރީ 2024ގެ 14:00 އެވެ. ގައުމީ ޔުނިވާސިޓީގެ ކެމްޕަސްތަކުގެ ތެރެއިން މާލެ ފިޔަވާ އެންމެ ގިނަ ދަރިވަރުން ތައުލީމު ހާސިލުކުރާ ކެމްޕަހަކީ ކުޅުދުއްފުށީ ކެމްޕަހެވެ.