ބެލޮންޑޯއަށް އެމްބާޕޭގެ ވަރުގަދަ ވަކާލާތެއް: "ތާރީހީ ކާމިޔާބީއަށް އިނާމު ލިބެންޖެހޭނެ"

ދުނިޔޭގެ އެންމެ ޝަރަފުވެރި ފުޓްބޯޅަ އިނާމު ކަމަށްވާ ބެލޮންޑޯއަށް ވޯޓު ދިނުމުގެ ފުރުސަތު އޭނާއަށް ލިބިއްޖެނަމަ، ވޯޓު ދޭނީ ސީދާ އަމިއްލަ ނަމަށް ކަމަށާއި، ތާރީހީ ގޮތުން ހޯދާފައިވާ ރެކޯޑުތަކަށް އޭނާއަށް އެއެވޯޑު ހައްގުވާނެ ކަމަށް ރެއާލް މެޑްރިޑްގެ ފްރާންސް ތަރި ކިލިއަން އެމްބާޕޭ ބުނެފި އެވެ.

ފްރާންސްގެ މަޝްހޫރު 'ލޭކިޕް' (L'Équipe) ނޫހަށް ދިން ހާއްސަ އިންޓަވިއުއެއްގައި އެމްބާޕޭ ދެއްކި އަދި މިއަދު އާންމުވި ވާހަކަތަކަށް އިޝާރާތްކޮށް، އިޓަލީގެ ކުޅިވަރު ނޫސްވެރިޔާ ފަބްރިޒިއޯ ރޮމާނޯ ވަނީ މި ކަމުގެ ތަފްސީލުތައް ހާމަކޮށްފަ އެވެ.

ނިމިދިޔަ ސީޒަނުގައި ކްލަބް މެޑްރިޑާއެކު ބޮޑު ތައްޓެއް ނުހޯދެވުނު ނަމަވެސް، އަމިއްލަ ކުޅުމާއި ޖެހި ގޯލުތަކަށް ބަލާއިރު ބެލޮންޑޯ ހޯދުމުގެ ފުރިހަމަ ހައްގު އޭނާއަށް އެބައޮތް ކަމަށް އެމްބާޕޭ ވަކާލާތު ކުރި އެވެ. "ބެލޮންޑޯއަށް ވޯޓު ދޭނީ ކާކަށްހޭ އަހައިފިނަމަ، އަހަރެން ވޯޓު ދޭނީ އަމިއްލަ ނަމަށް. މިއީ އިންޑިވިޖުއަލް އެވޯޑެއް. އަހަރެމެން ބަލަންޖެހޭނީ ކުޅުންތެރިޔާ ވަކިން ހޯދި ކާމިޔާބީތަކަށް. ބައެއް މީހުން އެބަބުނޭ އަހަރެން ތައްޓެއް ނުހޯދައޭ. ނަމަވެސް ބެލޮންޑޯގެ އެންމެހައި ޝަރުތުތައް ފުރިހަމަކޮށްގެން ސަތޭކަ އިންސައްތަ އިންސާފުން އެވޯޑު ލިބުނު އެއްވެސް ކުޅުންތެރިއަކު އަހަރެން ދެކެފައެއް ނެތިން. އެއްވެސް ކުޅުންތެރިއަކު އެންމެންގެ އިއްތިފާގުން ބެލޮންޑޯ ކާމިޔާބުކޮށްފައި އެބައޮތްތަ؟ ނެތް!" އެމްބާޕޭ ސުވާލު އުފެއްދި އެވެ.

އެމްބާޕޭ ވަނީ ވޯލްޑް ކަޕް ތާރީހުގައި އެންމެ ގިނަ ގޯލު ޖެހި ކުޅުންތެރިޔާގެ ރެކޯޑު މުގުރާލާފަ އެވެ. އަދި ޗެމްޕިއަންސް ލީގާއި ވޯލްޑް ކަޕްގެ އެންމެ ގިނަ ގޯލު ޖެހި ކުޅުންތެރިޔާގެ މަގާމު ހޯދުމަކީ މީހުންގެ ހަނދާނުން ފޮހެވިގެންދާނެ ކަންކަމެއް ނޫން ކަމަށް ބުނެފަ އެވެ. "ތާރީހު ބަދަލުކޮށްލާ ފަދަ ކަންކަން ކުރުމުން އެކަމުގެ އިނާމު އަބަދުވެސް ލިބެންޖެހޭނެ ކަމަށް އަހަރެން ގަބޫލުކުރަނީ. އަހަރެން ދައްކާ ހުއްޖަތްތަކަށާއި، މި އަހަރު އެހެން ކުޅުންތެރިން ކުރި މަސައްކަތަށް ބަލާއިރު، އަހަރެން މި އެވޯޑު ހޯދައިފިނަމަ މީ މީހެއްގެ އަތުން ފޭރިގަތުން ކަމަކަށް ނުވާނެ. ނަމަވެސް އަހަރެންނާ ދެކޮޅުހަދާ މީހުންގެ ވިސްނުންވެސް އަހަރެންނަށް ފަހުމްވޭ. މިއީ ޑިކްޓޭޓަރޝިޕެއް (ހުދުމުހުތާރު ވެރިކަމެއް) ނޫން. ކޮންމެ މީހަކަށްވެސް އަމިއްލަ ރާގެއް އޮންނާނެ."

އެމްބާޕޭގެ މި ވަރުގަދަ ދައުވާއާއެކު، ބެލޮންޑޯއަށް އެންމެ ވާދަވެރި ބާސެލޯނާގެ 19 އަހަރުގެ ތަރި ލަމީން ޔަމާލް ވަނީ މީޑިއާގައި ރައްދެއް ދީފަ އެވެ. ބާސެލޯނާ އާއި ސްޕެއިންގެ ކާމިޔާބީތަކަށް އިޝާރާތްކޮށް ޔަމާލް ބުނީ، އޭނާ އެވޯޑު ހޯދަން 'ސަލާމްޖަހަން' ނުވަތަ މީޑިއާ ކެމްޕޭން ކުރަން ނުޖެހޭނެ ކަމަށާއި، ވޯޓު ދިނުން އޮތީ ނޫސްވެރިންގެ އަތްމަތީގައި ކަމަށެވެ. ޔަމާލް ވަނީ ސްޕެއިންއާއެކު ވާލްޑް ކަޕް ކާމިޔާބުކޮށް، ބާސެލޯނާއާއެކު ލީގު ދިފާއުކޮށްފައިވާކަން ފާހަގަކޮށް، އަމިއްލައަށް ދެކެން ބޭނުންވާ ގޮތަކަށް ކަންކަން ދެކުމުގެ ހައްގު އެންމެންނަށްވެސް އޮންނާނެ ކަމަށް ބުނެފަ އެވެ.

ކުޅިވަރު ތަހުލީލުކުރާ ފަރާތްތަކުން ގަބޫލުކުރާ ގޮތުގައި، އެމްބާޕޭގެ މި އިންޓަވިއުއަކީ އޭނާގެ އަމިއްލަ އިންޑިވިޖުއަލް ރެކޯޑުތަކުގެ މައްޗަށް ބިނާކޮށް ބެލޮންޑޯ ހޯދުމަށް ކުރި ސީދާ ވަކާލާތެކެވެ. ނަމަވެސް، ޓީމު ކާމިޔާބީއާއި ތަށިތަކަށް އިސްކަންދޭ ފަރާތްތަކުން ޔަމާލް އަދި ހެރީ ކޭން ފަދަ ކުޅުންތެރިންނަށް ތާއީދު ކުރަމުންދާއިރު، އޮކްޓޯބަރު 26 ގައި ލަންޑަންގައި ބޭއްވޭ ބެލޮންޑޯ ހަފްލާގެ ކުރިން މުޅި ފުޓްބޯޅަ ދުނިޔޭގެ ސަމާލުކަން ވަނީ މި ދެ ތަރިންގެ ބަހުގެ ހަމަލާތަކަށް ހުއްޓިފަ އެވެ.