ރަމަޟާންމަހުގެ ރޭތައް އިހުޔާކުރުމުގެ ޖަލްސާއެއް ކުޅުދުއްފުށީގައި ބާއްވަނީ

އިބްރާހިމް ހަމީދު

ރަމަޟާން މަހުގެ ރޭތައް އިހްޔާކުރުމުގެ ޖަލްސާ ކުޅުދުއްފުށީގައި ބާއްވާގޮތަށް ހަމަޖެހިފައިވާ ކަމަށް ކުޅުދުއްފުށީ ކައުންސިލް އިދާރާއިން ބުނެފިއެވެ.

ކުޅުދުއްފުށީ އޮންލައިނަށް މަޢުލޫމާތު ދެއްވަމުން ކައުންސިލް މެމްބަރ އަބްދުއްޝުކޫރު އަހްމަދު ވިދާޅުވީގައުމީ އިދާރާއާއި ކައުންސިލް އިދާރާ އަދި އިސްލާމިކް މިނިސްޓްރީ ގުޅިގެން ރަމަޟާންމަހުގެ ރޭތަށް އިހްޔާކުރުމުގެ ޖަލްސާއެއް އަންނަ ބުރާސްފަތި ދުވަހުގެ ރޭ 9:30 ގައި ކުޅުދުއްފުށީ އަފީފުއްދީން ސްކޫލުގައި ބާއްވާގޮތަށް ހަމަޖެހިފައިވާ ކަމަށެވެ.

އިތުރަށް މަޢުލޫމަތު ދެއްވަމުން ޝުކޫރު ވިދާޅުވީ ކުޅުދުއްފުށީގައި މިބާއްވާ ޖަލްސާއަކީ ސްކޫލު ކުދިންގެ އިތުރުން ހުރިހާ އުމުރުފުރައެއްގެ މީހުންނަށް ބައިވެރިވެވޭގޮތަށް ބާއްވާ އެ ޖަލްސާގައި ދީނީ ނަސޭހަތްދިނުމުގެ އިތުރުން ސުވާލާއި ޖަވާބު ދިނުމުގެ ސެޝަނެއް އޮންނާނެ ކަމަށެވެ.

ކޮންމެ އަހަރަކު ރަމަޟާންމަހު ސަރުކާރުން ސިލްސިލާކޮށް ކުރިއަށް ގެންދާ މި ޕްރޮގުރާމުގެ ދަށުން މީގެ ކުރީ އަހަރުތަކުގައި މިފަދަ ޖަލްސާތައް ބާއްވާފައިވަނީ ހަމައެކަނި މާލޭގައެވެ. އެހެންނަމަވެސް މިއަހަރު އަތޮޅުތެރޭގެ ބައެއް ރަށްރަށުގައިވެސް މިޕުރޮގްރާމް ފަށާފައިވާއިރު މިދިޔަ ހަފުތާގައި އައްޑޫ ސިޓީގެ ހިތަދޫގައި ވަނީ އިހުޔާކުރުމުގެ ޖަލްސާއެއް ބާއްވާފައެވެ.

އިސްލާމިކް މިނިސްޓްރީގެ ފަރާތުން ކުޅުދުއްފުށީގައި ބާއްވާ އިހުޔާކުރުމުގެ ޕުރޮގްރާމުގައި ދީނީ ނަސޭހަތް ދެއްވާނީ ޝެއިހް މުހައްމަދު މޫސާ އެވެ. ސުވާލުތަކަށް ޖަވާބުދިނުމުގެ ސެޝަނުގައި ބައިވެރިވެވަޑައިގަންނަވާނީ ހެލްތް މިނިސްޓްރީގެ ފާތިމަތު އާފިޔާގެ އިތުރުން އިސްލާމިކް މިނިސްޓަރ ޑރ އަބްދުލްމަޖީދު އަބްދުލް ބާރީ އެވެ.