ނުވަ ސިއްހީ މަރުކަޒެއް ހޮސްޕިޓަލަށް ބަދަލު ކުރަނީ

ނުވަ ސިއްހީ މަރުކަޒެއް ތަރައްގީކޮށް ހޮސްޕިޓަލަށް ބަދަލުކުރުމުގެ މަސައްކަތް ފަށައިފައިވާކަމަށް ހެލްތް މިނިސްޓަރު ވިދާޅުވެއްޖެވެ.

ނޫސްވެރިންނާ ވާހަކަދައްކަވަމުން ހެލްތް މިނިސްޓަރު އަބުދުﷲ އަމީން މިއަދު ވިދާޅުވީ މި އަހަރު ފެށުމާއެކު ކުރެވުނު މަސަކަތްތަކުގެ ތެރޭގައި ސިއްހީ މަރުކަޒުތައް ހޮސްޕިޓަލުތަކަށް ބަދަލުކުރުން ހިމެނެ އެވެ. އެގޮތުން 9 ތަނެއް ބިޑް ކުރެވި ބިޑްތަށް ހަވާލުކުރުމުގެ މަރުހަލާގައި ވާކަމަށެވެ. އަދި މީގެ އިތުރުން 4 ތަނެއް ހަވާލުކުރުމުގެ މަސައްކަތް ކުރެވެމުން ދާކަމަށެވެ.

އެ ހޮސްޕިޓަލުތަކުގެ އަމަލީ މަސައްކަތް ކުރިއަށް އޮތް 2 މަސްދުވަހުގެ ތެރޭގައި ފެށިގެންދާނެކަމަށް ވެސް ނޫސްވެރިންގެ ބައްދަލުވުމުގައި މިނިސްޓަރު ފާހަގަކުރެއްވި އެވެ.

އަދި މީގެ އިތުރުން އެންބިއުލަންސްގެ ހިދުމަތް އެންމެ ބޭނުންޖެހިފައިވާ ގާތްގަނޑަކަށް 70 އަށްވުރެން ގިނަ ރަށަށް އެންބިއުލާންސްގެ ހިދުމަތް ފޯރުކޮށްދެވުމުގެ މަސައްކަތްވެސް މި އަހަރުތެރޭގައި ކުރަމުންދާކަމަށް މިނިސްޓަރު ވިދާޅުވި އެވެ.