އަލަށް އުފަންވާ ކުދިންނަށް ހަދިޔާއެއް ދޭކަށް އަދި ނުފަށާ: ހޫދު

އަލަށް އުފަންވާ ކުދިންނަށް ހަދިޔާއެއްގެ ގޮތުގައި ރައީސް އިބުރާހިމް މުހައްމަދު ސޯލިހް ވައުދުވެވަޑައިގެންނެވި "ބޭބީ ބޮކްސް" ދޭން އަދި ނުފަށާ ކަމަށް ރައީސް އޮފީހުން މިއަދު ބުނެފި އެވެ.

މިއަދުން ފެށިގެން "ބޭބީ ބޮކްސް"ގެ ވައުދު ތަންފީޒު ކުރަން ފަށާފައިވާ ކަމަށް ބުނެ ސޯޝަލް މީޑިއާގައި ވަނީ ވާހަކަ ފެތުރިފަ އެވެ. ވައުދުވި "ބޭބީ ބޮކްސް"ގެ ބަދަލުގައި މިހާރު ދެނީ ވައުޗަރެއް ކަމަށާއި އެ ހިފައިގެން އެސްޓީއޯގެ ބޭސް ފިހާރައަށް ދިޔުމުން ހަދިޔާ ލިބޭނެ ކަމަށް ބުނެ އޭގެ ފޮޓޯތައް ވެސް ދަނީ ދައުރުވަމުންނެވެ.

ނަމަވެސް އެކަމާ ގުޅޭ ގޮތުން ރައީސް އޮފީހުގެ ތަރުޖަމާން އިބްރާހިމް ހޫދު ވިދާޅުވީ އެ ވައުދު އަދި ފުއްދާފައިނުވާ ކަމަށާއި އެއީ އެސްޓީއޯއިން އަމިއްލައަށް ކުރިއަށްގެންދާ ކަމެއް ކަމަށެވެ.

ރައީސް ވެވަޑައިގަތް ހަދިޔާ ދިނުމުގެ ވައުދު ވަރަށް އަވަހަށް ފުއްދަވާނެ ކަމަށް ހޫދު ވިދާޅުވި އެވެ.

ރައީސް ސޯލިހު ވައުދުވެފައި ވަނީ ރާއްޖޭގެ ހުރިހާ އާއިލާތަކުން އުފަންވާ ކޮންމެ ކުއްޖަކަށް ދައުލަތުގެ ފަރާތުން ހަދިޔާއެއްގެ ގޮތުގައި ތަންމަތި ފޮއްޓަކާއެކު، ކުއްޖާއަށް ބޭނުންވާ އަސާސީ ތަކެއްޗާއި ސިއްހީ މައުލޫމާތުތަކުގެ ލުއިފޮތެއް ހިމެނޭ "ބޭބީ ބޮކްސް" ދިނުމަށެވެ.