އިންޑިއާ އާއި މެލޭޝިއާގައި ދިރިއުޅޭ ދިވެހިން އެމްބަސީގައި ރަސްޖިސްޓަރީވާން އެދެފި

މިހާރު ހަލުވިކަމާ އެކު ފެތުރެމުން އަންނަ ކޮރޯނާވައިރަސް ނުވަތަ ވުހާން ވައިރަސްއާ ގުޅިގެން އިންޑިއާ އާއި މެލޭޝިއާގައި ދިރިއުޅޭ ދިވެހިން އެ ގައުމުތަކުގައި ހުންނަ ރާއްޖޭގެ އެމްބަސީގައި ރަޖިސްޓްރީ ވާން އަންގައިފި އެވެ.

ޗައިނާގައި ފެތުރެން ފެށި މި ވައިރަސްއާ ގުޅިގެން މިހާތަނަށް 40 މީހުން ވަނީ މަރުވެފަ އެވެ. ފަރުވާއެއް ހޯދިފައި ނުވާ މި ބައްޔަށް އެކި ގައުމުތަކުން 1،700 އަށް ވުރެ ގިނަ މީހުން ވަނީ ޕޮޒިޓިވް ވެފަ އެވެ.

We advice all Maldivians currently in Malaysia to register at the Embassy. Pls call our hotline +60126557895 for consular assistance. pic.twitter.com/PvuPd2af76

— Maldives Embassy, Malaysia (@MDVinMalaysia) January 26, 2020

ޗައިނީސް އާ އަހަރު ފާހަގަކުރުމުގެ ގޮތުން އެ ގައުމުގެ އެތެރޭގެ އަދި ގައުމުން ބޭރަށް މީހުން ކުރާ ދަތުރުކުރާ މީހުންގެ އަދަދު އިތުރުވި އެވެ. ގައިންގަޔަށް ފަސޭހަކަމާ އެކު ފެތުރޭ މި ވައިރަސް އެހެންކަމުން ދަނީ ބާރު ސްޕީޑުގައި ފެތުރެމުންނެވެ.

މި ދެ ގައުމުގެ އެމްބަސީގެ އިތުރުން ޖަޕާނު އެމްބަސީންވެސް ޓްވިޓާ މެދުވެރިކޮށް އެދިފައި ވަނީ އެ ގައުމުތަކުގައި ދިރިއުޅޭ ދިވެހިން އެ ގައުމުގައި ހުރި ރާއްޖޭގެ އެމްބަސީގައި ރަޖިސްޓްރީ ވާށެވެ. މެލޭޝިއާ އެމްބަސީގެ ހޮޓްލައިން 60126557895+ އަށް ގުޅުމުން އެތަނުގެ ކޮންސިއުލާ ހިދުމަތްތައް ލިބޭނެ ކަމަށް އެމްބަސީން ބުނެ އެވެ. އިންޑިއާގެ އެމްބަސީން އެދުނީ އެ މީހެއްގެ ނަމާއި އެ މީހަކު ދިރިއުޅޭ ސިޓީ އަދި އިމަޖެންސީ ހާލަތެއްގައި ގުޅޭނެ އާއިލާ މީހެއްގެ ނަންބަރު ވެސް އިންޑިއާ އެމްބަސީއާ ހިއްސާ ކުރާށެވެ.

ބާރު ސްޕީޑުގައި އޭޝިއާގެ ގައުމުތަކުގައި ފެތުރެމުންދާ ވުހާން ވައިރަސް މެލޭޝިއާ އިން އިއްޔެ ފެނުނު ނަމަވެސް، މި ބަލިި އަދި އިންޑިއާ އަކުން ނުފެނެ އެވެ. ނަމަވެސް މި ބައްޔަށް ޝައްކުކުރެވޭ 11 މީހަކު ތިބި ކަމަށް އިންޑިއާގެ މީޑިއާތަކުން ބުނެ އެވެ.