ހަނގުރާމައިން އަންނަ މީހުން ރިހިބިލިޓޭޓް ކުރާ މަރުކަޒުގެ މަސައްކަތް ހުރީނިމިފަ

ސީރިއާގައި ހާލުގައި ޖެހިފައި ތިބި ދިވެހި އަންހެނުންނާއި ކުޑަކުދިން އެހެން ގައުމަކަށް ގެންދިޔުމަށް ފަހު އަނބުރާ ރާއްޖެ ގެނައުމުގެ މަސައްކަތް ކުރަމުން އަންނަ ކަމަށާއި އެ މީހުން އަނބުރާ ރާއްޖެ ގެނެސް މުޖުތަމައަށް ނެރުމުގެ ކުރިން ހަނގުރާމައިން އަންނަ މީހުން ރިހިބިލިޓޭޓް ކުރުމަށް ކ. ހިންމަފުށީގައި އިމާރަތްކުރާ ޑީ-ރެޑިކަލައިޒޭޝަން އެންޑް ރީހެބިލިޓޭޝަން ސެންޓަރުގެ މަސައްކަތް ނިމިފައިވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.

ސީރިއާގައި ހާލުގައި ޖެހިފައިވާ ދިވެހި އަންހެނުންނާއި ކުޑަކުދިން ރާއްޖެ ގެނެސް އެ މީހުން ރިހެބިލިޓޭޓްކޮށް އަނބުރާ މުޖުތަމައަށް ގެނައުމުގެ މަސައްކަތް ކުރަން ނިންމެވީ ރައީސް ސޯލިހެވެ.

އެމީހުން ރިހެބިލިޓޭޓް ކުރާ މަރުކަޒުގެ މަސައްކަތް ފެށީ މިދިޔަ ސެޕްޓެމްބަރު މަހުގެ ތެރޭގައެވެ. އެ މަސައްކަތް ހަވާލުކޮށްފައި ވަނީ ޕޮލިސް ވެލްފެއާ ކޯޕަރޭޝަން (ޕޮލްކޯ) އަށް، 49 މިލިއަން ރުފިޔާއަށެވެ.

ނޭޝަނަލް ކައުންޓާ ޓެރަރިޒަމް ސެންޓަރު (އެންސީޓީސީ) އިން ހާމަކޮށްފައިވާ ގޮތުގައި ސީރިއާ ހަނގުރާމައިގައި ބައިވެރިވުމަށް 173 ދިވެއްސަކު ވަނީ ގޮސްފައެވެ. އޭގެ ތެރޭގައި ހިމެނެނީ 53 ޕަސެންޓު ފިރިހެނުންނާއި 26 ޕަސަންޓު އަންހެނުން އަދި 26 ޕަސަންޓު ކުޑަކުދިންނެވެ.