ރާއްޖޭގައި ފަރުވާ ދެވެން ނެތް 33 މީހަކު ފަރުވާއަށް ބޭރަށް ގެންދަނީ

ހާލު ބޮޑު 33 މީހަކު ރާއްޖެއިން ފަރުވާ ދެވެން ނެތުމުން ބޭރަށް ގެންދަން މަސައްކަތް ކުރަމުން އަންނަ ކަމަށް އާސަންދަ ކުންފުނިން ބުނެފި އެވެ.

އެންއީއޯސީ އިން ރޭ ބޭއްވި ނޫސްވެރިންގެ ބައްދަލުވުމުގައި އާސަންދަ ކުންފުނީގެ މެނޭޖިން ޑިރެކްޓަރު މަރިޔަމް ޝަފީގު ވިދާޅުވީ ރާއްޖެއިން ބޭރަށް ކޮންމެހެން ދާން ޖެހޭ ސީރިޔަސް ހާލަތުގައި ތިބި ވަރަށް ބައިވަރު ބަލި މީހުން އެބަތިބި ކަމަށެވެ.

އެގޮތުން ބަލި ހާލަތު ކްރިޓިކަލް ލިސްޓުގައި ގިނަ އަދަދެއްގެ މީހުން އެބަތިބި ކަމަށާއި އެހެން ނަމަވެސް އޭގެ ތެރެއިން ވެސް އެންމެ ސީރިޔަސް 33 މީހަކު ބޭރަށް ގެންދިޔުމަށް މަސައްކަތް ކުރަމުން އަންނަ ކަމަށް އޭނާ ވިދާޅުވި އެވެ.

ބޮޑަށް އިސްކަން ދޭނީ ރާއްޖޭގައި އެއްގޮތަކަށް ވެސް ލިބެން ނެތް ހިދުމަތްތައް ފޯރު ކޮށްދިނުމަށް ކަމަށްވެސް މަރިޔަމް ވިދާޅުވި އެވެ.

އެ މީހުން ބޭރަށް ގެންގޮސް ދޭން ޖެހޭ ހިދުމަތްތައް ފޯރު ކޮށްދިނުމަށްޓަކައި ފޮރިން މިނިސްޓްރީން އިންޑިޔާ އަދި ސްރީލަންކާ ސަރުކާރާ ވާހަކަ ދައްކަމުން އަންނަ ކަމަށް އޭނާ ވިދާޅުވި އެވެ.