މެސީ އެންމެ ފަހުން ބާސެލޯނާ ދޫކޮށްލަނީ؟

އާޖެންޓިނާ އަދި ބާސެލޯނާގެ ތަރި ލިއޮނަލް މެސީ ބާސެލޯނާ ދޫކޮށް އެހެން ޓީމަކަށް ބަދަލުވުމަށް ބޭނުން ވާކަން ހާމަކޮށްފި އެވެ. އެގޮތުން ބާސެލޯނާގެ އާ ކޯޗު ރޮނާލްޑޯ ކޮއެމަންއާއި މެސީ ވަނީ މިދިޔަ ހަފްތާ މިކަމާ ބެހޭގޮތުން ވާހަަކަ ދައްކާފައެވެ.

ބާސެލޯނާއާއެކު މެސީ ހަދާފައިވާ ކޮންޓްރެކްޓް ހަމަވާނީ 2021 ވަނަ އަަހަރުގެ ނިޔަލަށެެވެ. އަދި މިހާރު އޮތް ގޮތުން އަންނަ ޖެނުއަރީ މަހުގެ ކުރިން މެސީ ބަސެލޯނާގެ އެއްބަސްވުން އާ ނުކޮށްފިނަމަ ހިލޭ ޓްރާންޕާއެއްގައި އެ ޓީމު ދޫކޮށްލަން އެހެން ކުލަބަކާއިއެކު ޕްރީ އެގްރީމެންޓެއްގައި ސޮއި ކުރުމުގެ އިހުތިޔާރު ލިބިގެންދާނެ އެވެ.

މިހާތަނަށް ބެލޮންޑިއޯރ އެވޯޑް 6 ފަހަރު ހޯދާފައިވާ 33 އަހަރުގެ ކުޅުންތެރިޔާ ކްލަބު ދޫކޮށްލަން ބޭނުންވާ ސަބަބެއްކަމުގައި، ކޮއެމެން ގެ ޕްލޭނެއްގައި ބާސާގެ ފޯވާޑް ލުއިސް ސުވަރޭޒް ނެތުމާއި، ބާސާ ފަހުން ނެރެމުން އައި ދަށް ނަތީޖާތައް ހިމެނެއެވެ.

މި ހަބާރާއެކު މުޅި ކެރިއަރު ބާސާގައި ހޭދަކުރި މެސީ ހޯދުމަށް ގިނަ ޓީމުތައް ދަނީ މަސައްކަތް ކުރަމުންނެވެ. އުމުރުން 17 އަހަރުގައި ބާސެލޯނާ ފުރަތަމަ ޓީމަށް ކުޅެން ފެށި މެސީވަނީ އެ ކްލަބަށް 731 މެޗު ކުޅެދީ 634 ލަނޑު ޖަހާދީފައެވެ. އަދި 276 ލަނޑު އެސިސްޓް ކޮށްދީފައިވާއިރު އެ ކްލަބާއެކު މެސީވަނީ 34 ޓްރޮފީ ހޯދާފައެވެ.

މެސީ ބާސާ ދޫކޮށްލަން ބޭނުންވާ ކަމަށް ބުނެފައިވާއިރު ނިމިގެން ދިޔަ ޗެމްޕިއަންސް ލީގުގެ ކުއާޓާ ފައިނަލްގައި ބާސާ ވަނީ ބަޔާން މިއުނިކް އަތުން 8-2 ގެ ނަތީޖާއަކުން ބަލި ވެފައެވެ.

މި ސީޒަން ބާސާއިން ނިންމާލީ ހުސްއަތާއެވެ. މިއީ ފާއިތުވި 12 އަަހަރުތެރޭ ބާސާއަށް ތައްޓެއް ނުލިބި ނިންމާލި ފުރަތަމަ ފަހަރެވެ.