ޔޫރޯ ފައިނަލުގައި ބޮނޫޗީ ދުނިޔޭގެ ރެކޯޑެއް މުގުރާލައިފި

އިޓަލީގެ ތަޖުރިބާކާރު ޑިފެންޑަރު ލިއޮނާޑޯ ބޮނޫޗީ ޔޫރޯ ފައިނަލުގައި އިންގްލޭންޑް ކޮޅަށް ޖެހި ލަނޑާއެކު ދުނިޔޭގެ ރެކޯޑް ފޮތުން ޖާގަ ހޯދައިފި އެވެ.

ފައިނަލުގައި 1 ގޯލުގެ ތަފާތުން އިޓަލީ ދަށްވެފައި އޮއްވާ މެޗުގެ 67 ވަނަ މިނެޓު އިޓަލީއަށް ލިބުނު ކޯނަރަކުން މާކޯ ވެރާޓީ ބޮލުން ފޮނުވާލި ބޯޅަ ރީބައުންސްވި ވަގުތު ގޯލުގެ ތެރެއަށް ވައްދާލައިން ބޮނޫޗީ ވަނީ އިޓަލީ ސަލާމަތްކޮށްދީ މެޗު ޕެނަލްޓީއާ ހަމައަށް ގެންގޮސްދީފަ އެވެ. ބޮނޫޗީ މިހާތަނަށް ވަނީ 2 ވޯލްޑް ކަޕްގެ އިތުރުން 3 ޔޫރޯގައި އިޓަލީ ތަމްސީލުކޮށްދީފަ އެވެ.

2006 ވަނަ އަހަރުގެ ވޯލްޑް ކަޕް ކާމިޔާބުކުރި ފަހުން ބޮޑު މުބާރާތެއްގެ ތަށި އިޓަލީއަށް ހޯދިފައި ނުވާއިރު 53 އަހަރަށް ފަހު އިޓަލީން ޔޫރޯ ކާމިޔާބުކުރިއިރު ބޮނޫޗީ ވެފައި މިވަނީ އެގައުމުގެ ރައްޔިތުންނަށް ހީރޯއަކަށެވެ. އަދި 9 އަހަރަށް ފަހު ބޮޑު މުބާރާތެއްގެ ތަށި އިޓަލީ ހޯދި މީ ފުރަތަމަ ފަހަރެވެ.

މިލަނޑާއެކު ބޮނޫޗީ ވެގެން ގޮސްފައި މިވަނީ ޔޫރޯ ފައިނަލެއްގައި ލަނޑުޖެހި އެންމެ އުމުރުން ދުވަސްވީ ކުޅުންތެރިޔާ އަށެވެ. ލަނޑު ޖެހިއިރު ބޮނޫޗީގެ އުމުރަކީ 34 އަހަރާއި 71 ދުވަހެވެ. މީގެ ކުރިން މި ރެކޯޑް އޮންނަނީ ޖަރުމަނުގެ ބާންޑް ހޮލްޒެންބައިން އަތުގަ އެވެ. 1976 ވަނަ އަހަރުގެ ޔޫރޯ ފައިނަލުގައި ޗެކްސްލޮވޭކިއާ ކޮޅަށް ޖެހި ލަނޑުންނެވެ. މިއީ ވެސް މެޗުގެ ނަތީޖާ ހަމަކޮށްދިން ލަނޑެކެވެ. އެކަމަކު ޕެނަލްޓީއަށް ގޮސްގެން އެފަހަރު ޖަރުމަނު ބަލިވީ އެވެ. އޭރު ހޮލްޒެންބައިންގެ އުމުރަކީ 30 އަހަރާއި 103 ދުވަހެވެ.