ޕޮޗެޓީނޯ ޕީއެސްޖީއާއެކު އާ އެއްބަސްވުމަކަށް

މިހާރު ޕީއެސްޖީއާ ހަވާލުވެ ހުރި ހެޑް ކޯޗު މައުރީސިއޯ ޕޮޗެޓީނޯ އެ ކްލަބާ އެކު ހަދާފައިވާ އެއްބަސްވުން އާ ކޮށްފި އެވެ.

އަންނަ އަހަރު ޕީއެސްޖީއާ އެކު ޕޮޗެޓީނޯ ހެދި ކޮންޓްރެކްޓް ހަމަވާއިރު އިއްޔެ ޕޮޗެޓީނޯ ސޮއިކުރި އެއްބަސްވުމުގައިވާ ގޮތުގައި އޭނާ 2023 ވަނަ އަހަރާ ހަމައަށް އެ ކްލަބްގައި މަޑުކުރާނެ އެވެ.

މިދިޔަ ސީޒަނުގައި ޕީއެސްޖީއާއެކު ފްރެންޗް ސުޕަ ކަޕާއި ފްރެންޗް ކަޕް ކާމިޔާބުކުރި ކޯޗު އެ ޓީމާ ހަވާލުވީ މިއަހަރުގެ ޖެނުއަރީ މަހުގަ އެވެ.

ކްލަބުން ފަށާފައިވާ ބޮޑު ޕްރޮޖެކްޓްގައި އޭނާގެ ބައިވެރިވުން ހިމެނޭ ގޮތަށް ބޮޑު ކާމިޔާބީއެއް ހޯދަން ލިބިފައި އޮތް ފުރުސަތުގެ ބޭނުން ރަނގަޅަށް ހިފުމަކީ އެއްބަސްވުން އާ ކުރުމުގެ އެންމެ ބޮޑު މަގްސަދު ކަމަށް ޕޮޗެޓީނޯ ވަނީ ބުނެފަ އެވެ.

ޕޮޗެޓީނޯއާ ޕީއެސްޖީ ހަވާލުކުރީ އޭނާ އަކީ ޕީއެސްޖީގެ ކުރީގެ ކުޅުންތެރިއަކަށް ވެފައި އޭނާ ކޯޗިންގައި ހޯދަމުން އަންނަ ކުރިއެރުން ރަނގަޅުވުމުންކަމަށް މީގެ ކުރިން ވެސް ޕީއެސްޖީގެ ރައީސް ނާސިރު އެލް ހެއްލާފީ ވަނީ ވިދާޅުވެފަ އެވެ.

ރެއާލް މެޑްރިޑްގެ ސާޖިއޯ ރާމޯސް އާއި އޭސީ މިލާންގެ ޖިއަންލުއީޖީ ޑޮންނަރުންމާ، ލިވަޕޫލްގެ ޖިއޮޖީނިއޯ ވައިނަލްޑަމް އަދި އިންޓަ މިލާނުގެ އަޝްރަފް ހަކީމީގެ ސޮއި ހޯދާ ކުރިއަށް އޮތް ސީޒަނަށް ޕީއެސްޖީ ވަނީ ވަރަށް ވަރުގަދަކޮށްފަ އެވެ.