އިނގިރޭސި ފުޓްބޯޅައިގެ ތާރީހުގައި އެންމެ އަގު ބޮޑު ޓްރާންސްފާއަކަށް ގްރީލިޝް؟

އެސްޓަން ވިލާގެ ކެޕްޓަން އަދި އިނގިރޭސި މިޑްފީލްޑަރު ޖެކް ގްރީލިޝް ގަންނަން މެންޗެސްޓަރ ސިޓީން ރެކޯޑް އަގެއް ހުށައަޅައިފި އެވެ. މި ޓްރާންސްފާ ކާމިޔާބުވެއްޖެނަމަ މި ޓްރާންސްފާ ވެގެންދާނީ އިނގިރޭސި ފުޓްބޯޅައިގެ ތާރީހުގައި އެންމެ އަގު ބޮޑު ޓްރާންސްފާ އަށެވެ.

މިހާތަނަށް އިނގިރޭސި ފުޓްބޯޅައިގައި ކުރެވުނު އެންމެ އަގުބޮޑު ޓްރާންސްފާއަކީ 2016 ވަނަ އަހަރު މެންޗެސްޓާ ޔުނައިޓެޑުން 123 މިިލިއަން ޑޮލަރު (89 މިލިއަން ޕައުންޑް) ޔުވެންޓަސް އިން ޕައުލް ޕޮގްބާ ގެނައި ޑީލެވެ. ގްރީލިޝްގެ ކުރިންވެސް ސިޓީން ވަނީ ޓޮޓެންހަމްގެ ކެޕްޓަން ހެރީ ކޭން ގަންނަން ވެސް ބޮޑު ބިޑެއްކޮށްފަ އެވެ. ނަމަވެސް ކޭން ވިއްކާލަން ކިޔާ އަގު 150 މިލިއަން ޕައުންޑަށް ވުރެ ކުޑަ ނުކުރުމުން އެޑީލް އޮތީ މަޑުޖެހިފަ އެވެ.

އެސްޓަން ވިލާގެ ތަރި ގެނައުމަށް ސިޓީން ހުށައެޅި ބިޑަކީ 140 މިލިއަން ޑޮލަރުގެ ބިޑެކެވެ. އެއީ 100 މިލިއަން ޕައުންޑެވެ. މިބިޑް ކާމިޔާބުވެއްޖެނަމަ މި ޓްރާންސްފާ ވެގެންދާނީ ޕްރިމިއާ ލީގުގެ އެންމެ އަގުބޮޑު ޓްރާންސްފާ އަށެވެ.

އެސްޓަން ވިލާ ސީނިއާ ޓީމަށް މިހާތަނަށް ގްރީލިޝް ކުޅެދިން 295 މެޗުން 43 ގޯލު ޖަހައި 59 ގޯލު ޖަހަން ފުރުސަތު ތަނަވަސްކޮށްދީފަ އެވެ. އޭނާ އަކީ އިނގިރޭސި ޕްރިމިއާ ލީގުގައި އެންމެ ރަނގަޅު ކުރިއެރުމެއް ހޯދި އަދި ހޯދަމުން އަންނަ އެއް ކުޅުންތެރިޔާ އެވެ.