މެކްސިކޯ ބަލިކޮށް އެމެރިކާއިން ގޯލްޑް ކަޕުގެ ތަށި ހިއްލާލައިފި

އުތުރު އެމެރިކާގައި ބޭއްވޭ އެންމެ ޝަރަފުވެރި ފުޓްބޯޅަ މުބާރާތް ކޮންކާކަފް ގޯލްޑް ކަޕްގެ ފައިނަލުގައި މެކްސިކޯ ބަލިކޮށް އެމެރިކާ އިން މުބާރާތުގެ ތަށި ހިއްލާލައިފި އެވެ.

މިއީ މިއަހަރުގެ ތެރޭގައި އުތުރު އެމެރިކާ ފުޓްބޯޅަ މުބާރާތްތަކުގެ ތެރެއިން ފައިނަލުގައި މެކްސިކޯ އަތުން އެމެރިކާ މޮޅުވި ދެވަނަ ފަހަރެވެ. މިދިޔަ ޖޫން މަހު އުތުރު އެމެރިކާގެ ނޭޝަންސް ލީގުގެ ފައިނަލުގައި އެމެރިކާ އިން ވަނީ 3 - 2 ން މެކްސިކޯ ބަލިކޮށްފަ އެވެ. ރޭގެ ފައިނަލުގައި އެމެރިކާއިން މެކްސިކޯގެ މައްޗަށް ކުރި ހޯދީ 1 - 0 ގެ ހަނި ތަފާތަކުންނެވެ.

އެލިޖަންޓް ސްޓޭޑިއަމްގައި ކުޅެވުނު މިމެޗުގައި އެމެރިކާގެ ހަމައެކަނި ލަނޑު އަދި އެމެރިކާ މެޗުން މޮޅުކޮށްދިން ލަނޑު އެޓީމުން ޖެހީ މެޗުގެ އިތުރު ވަގުތުގެ ދެ ވަނަ ހާފްގެ ވެސް ފަހު ކޮޅުގަ އެވެ. މެޗުގެ 117 ވަނަ މިނެޓްގައި އެމެރިކާއަށް މި ގޯލު ކާމިޔާބުކޮށްދިނީ ކެލީން އަކޮސްޓާ ހިލޭ ޖެހުމަކުން ނަގައިދިން ބޯޅައަކުން މައިލްސް ރޮބިންސަން އެވެ. އޭނާ މިލަނޑު ޖެހީ ބޮލުންނެވެ.

🏆🏆🏆🏆🏆🏆🏆

For the seventh time, we're CHAMPIONS of @Concacaf... The Gold Cup is ours!! 🇺🇸👏💪 pic.twitter.com/yMoc10QWR6

— U.S. Soccer MNT (@USMNT) August 2, 2021

އެމެރިކާ އިން މި ފަހަރުގެ ގޯލްޑް ކަޕް ކާމިޔާބުކުރީ މަޝްހޫރު ކުޅުންތެރިން ކަމަށްވާ ކްރިސްޓިއަން ޕުލިސިޗް އާއި ޖިއޯ ރެއިނާ އަދި ސާޖީނިއޯ ޑެސްޓް ފަދަ ކުޅުންތެރިން ނުލަ އެވެ. އަދި އެޓީމު ކުޅުނު ހުރިހާ މެޗަކުން މޮޅުވި އެވެ. މިއީ އެޓީމުން މިމުބާރާތުގެ ތަށީ ހިއްލާލި ހަތްވަނަ ފަހަރެވެ.

ރޭގެ މޮޅަކީ 2019 ވަނަ އަހަރު އެމެރިކާ ބަލިކޮށް މި މުބާރާތުގެ ތަށި ހޯދި މެކްސިކޯ އަތުން ހިފުނު ރަނގަޅު ބަދަލު ހިފުމެކެވެ.