ފަހުވަގުތު ލީގު ޗެމްޕިއަނުން ބަލިކޮށް ލެސްޓާއިން ޗެރިޓީ ޝީލްޑް ކާމިޔާބުކޮށްފި

އެންމެފަހުގެ ޕުރިމިއާ ލީގު ޗެމްޕިއަން މެންޗެސްޓަރ ސިޓީ ބަލިކޮށް ލެސްޓާ ސިޓީން ޗެރިޓީ ޝީލްޑް މެޗް ކާމިޔާބުކޮށްފި އެވެ. މިއަހަރުގެ އެފްއޭ ކަޕް ވެސް ކާމިޔާބުކުރީ ލެސްޓާ ސިޓީންނެވެ.

1 - 0 ގެ ނަތީޖާއަކުން ލެސްޓާ މިމެޗު ކާމިޔާބުކުރިއިރު މެޗުގެ ހަމައެކަނި ލަނޑު ލެސްޓާ ސިޓީއަށް ކާމިޔާބުކޮށްދިނީ މެޗުގެ 89 ވަނަ މިނެޓުގައި ލިބުނު ޕެނަލްޓީއަކުން ކެލެޗީ އިހެނާޗޯ އެވެ. މިއީ ސިޓީގެ ނޭތަން އަކޭ އިހެނާޗޯއަށް ކުރި ފައުލަކާ ގުޅިގެން ލިބުނު ޕެނަލްޓީއެކެވެ.

މިމެޗުގައި ސިޓީން ވަނީ ވަރަށް ގިނަ އާ ކުޅުންތެރިންނަށް ފުރުސަތުދީފަ އެވެ. ޕުރިމިއާ ލީގުގެ އެންމެ އަގުބޮޑު ކުޅުންތެރިޔާގެ ގޮތުގައި މެންޗެސްޓަރ ސިޓީއަށް މިސީޒަނަށް ބަދަލުވި ޖެކް ގްރީލިޝް ވެސް ވަނީ މެޗުގެ 65 ވަނަ މިނެޓުގައި ކުޅެން އަރުވާފަ އެވެ. ސިޓީން ގްރީލިޝް ގަތީ 100 މިލިއަން ޕައުންޑަށެވެ.