ޕީއެސްޖީ ޑީލް އަކީ ވުން އެކަށީގެންވާ ކަމެއް: މެސީ

ބާސެލޯނާއާއެކު 21 އަހަރު ހޭދަކުރުމަށް ފަހު އެޓީމުގެ އެންމެ މުހިންމު ކުޅުންތެރިޔާ އަދި ދުނިޔޭގެ ފުޓްބޯޅަ ތާރީހު ދެކުނު އެންމެ މޮޅު އެއް ކުޅުންތެރިޔާ ލިއޮނަލް މެސީ ބާސާ ދޫކޮށްލައިފި އެވެ. ލަލީގާގެ މުސާރައިގެ ލިމިޓާ ހެދި މެސީ އެފޯޑް ކުރެވެން ނެތުމުން ބާސާއިން މިވަނީ އޭނާ ދޫކޮށްލާފަ އެވެ.

6 ފަހަރު ދުނިޔޭގެ އެންމެ މޮޅު ކުޅުންތެރިޔާއަށް ދޭ ބެލަންޑޯ ކާމިޔާބުކޮށްފައިވާ މެސީ އަކީ މިއެވޯޑް އެންމެ ގިނަ ފަހަރަށް ހާސިލްކުރި ހަމައެކަނި ކުޅުންތެރިޔާ އެވެ.

"އަހަރެންނާއި އަހަރެންގެ އާއިލާއަށް ކަށަވަރުވެފައިވާ އޮތީ އަހަރެން ތިބޭނީ މިތާގައި ކަމަށް. ގޭގައި ކަމަށް" އާދިއްތަ ދުވަހު ބާސާއިން މެސީއަށް ހާއްސަކޮށްގެން ބޭއްވި ނޫސް ކޮންފަރެންސްގައި އޭނާ ބުންޏެވެ.

"

"މިއީ މިކުލަބުގައި އަހަރެންގެ ނިމުން. ދެން ފެށޭނީ މުޅިން އާ ސަފްހާއެއް. އާން. މިއީ އަހަރެންގެ ހަޔާތުގައި ވެސް އައި އެންމެ ހިތްދަތި އުދަނގޫ ދަނޑިވަޅު."

ދުނިޔެ ދުށް އެންމެ މޮޅު އެއް ފުޓްބޯޅަ ކުޅުންތެރިޔާ، ލިއޮނަލް މެސީ

މެސީ އިތުރަށް ބުނީ ބާސާ ދޫކޮށްލަން އޭނާ ބޭނުންނުވާ ކަމަށާއި ބާސާއަކީ އަހަރެން ވަރަށް ލޯބިވާ ކުލަބެއް ކަމަށާއި މިއީ އަންނާނެ ކަމަށް އަހަރެން އުއްމީދު ކުރި ދުވަހެއް ނޫން ކަމަށެވެ.

އުމުރުން 34 އަހަރުގެ މެސީ އަކީ މިހާރު ފްރީ އެޖެންޓެކެވެ. އޭނާ ބޭނުން ކުލަބަކަށް އޭނާއަށް މިހާރު ބަދަލުވެވޭނެ އެވެ. ނޫސް ކޮންފަރެންސްގައި ވާހަކަ ދައްކަމުން މެސީ ބުނީ އޭނާ މިހާ ދެރަވީ މިދިޔަ އަހަރު ދާން ބޭނުންވެފައި ހުރެފައި މިއަހަރު މަޑުކުރަން ބޭނުންވުމުން ކަމަށެވެ.

ބާސާގެ ރެކޯޑް ގޯލްސްކޯރާ މެސީ ގެންދިއުމުގެ އެންމެ ކުރީގައި މިވަގުތު އޮތީ ފުރާންސްގެ ގަދަބާރު ޕީއެސްޖީ އެވެ. އެޓީމަށް މެސީ ބަދަލުވެއްޖެނަމަ އޭނާއާ އެއްކޮށް ކުޅެން ތިބީ ކިލިއަން އެމްބާޕޭ އާއި ކުރިން މެސީ އެއްކޮށް ބާސާއަށް ކުޅުނު ނޭމާ އެވެ. މެސީ ޕީއެސްޖީއަށް ބަދަލުވެއްޖެނަމަ މިތިން ކުޅުންތެރިން ދުނިޔޭގެ އެންމެ މޮޅު ޓްރިއޯ އަށް ވުން ގާތެވެ.

ޕީއެސްޖީއަށް މެސީ ބަދަލުވާ ކަމަށް ދެކެވޭ ވާހަކަތަކަށް މެސީ ބުނީ އެއީ ވުން އެކަށީގެންވާ ކަމެއް ކަމަށާއި އަދި އެއްވެސް އެއްބަސްވުމަކާ ހަމައަށް ނުދާ ކަމަށެވެ. އޭނާ ގެންދަން އެހެން ކުލަބުތަކުން ވެސް ޝައުގުވެރިކަން އެބަހުރިކަމަށް ވެސް މެސީ ވަނީ ބުނެފަ އެވެ. އެހެންނަމަވެސް މެސީ ބުނީ ޕީއެސްޖީއާއެކު ވާހަކަ ދެކެވެމުންދާ ކަމަށެވެ.

މެސީ އާޖެންޓީނާ ދޫކޮށް ސްޕެއިނަށް ބަދަލުވީ އުމުރުން 13 އަހަރުގަ އެވެ. އަދި ބާސާއަށް އެންމެ ފުރަތަމަ މެޗެއް ކުޅުނީ 17 އޮކްޓޫބަރު 2004 ގަ އެވެ. ބާސާއާއެކު މެސީ 21 އަހަރު ހޭދަކޮށްފާވާއިރު ބާސާއަށް ކުޅެދިން 778 މެޗުގައި މެސީ ވަނީ 672 ގޯލު ޖަހާފަ އެވެ. އަދި ބާސާއަށް 34 ތަށި ހޯދުމަށް އެހީވެދީފަ އެވެ. މެސީ ކުލަބާއެކު ހާސިލްކުރި ހުރިހާ ކާމިޔާބީއެއް ނޫސް ކޮންފަރެންސްގައި ވަނީ ދައްކާލާފަ އެވެ.