74 އަހަރަށްފަހު އެނބުރި އައި ބުރެންޓްފޯޑުން އާސެނަލް ސިއްސުވާލައިފި
އިނގިރޭސި އެންމެ ބޮޑު ލީގަށް 74 އަހަރުފަހުން އައިސް ސީޒަނުގެ ފުރަތަމަ މެޗުން ބުރެންޓްފޯޑްއިން އާސެނަލް ސިއްސުވާލައިފި އެވެ.
އަލަށް ޕުރޮމޯޓްވި ބުރެންޓްފޯޑުން އާސެނަލް ބަލިކުރުންވީ އާސެނަލަށް ހައިރާންކަން ގެނުވި ކަމަކަށެވެ. މިއީ 74 އަހަރަށްފަހު އެޓީމު ޕްރިމިއާ ލީގުގައި ކުޅުނު ފުރަތަމަ މެޗެވެ. ބުރެންޓްފޯޑް ކޮމިއުނިޓީ ސްޓޭޑިއަމްގައި ބުރެންޓްފޯޑުން އާސެނަލް ބަލިކުރީ 2 - 0 ންނެވެ.
އާސެނަލްގެ ސަޕޯޓަރުން ރޮއްވާލައި ބުރެންޓްފޯޑުން މިމެޗު ކާމިޔާބުކުރިއިރު މެޗުގެ ފުރަތަމަ ލަނޑު އެޓީމަށް ޖަހައިދިނީ ސާޖި ކެނޮސް އެވެ. މިލަނޑު ޖަހަން އުފެއްދި އެޓޭކުގެ ތެރެއިން ބޯޅަ ބޭރުވިކަމަށް އާސެނަލްގެ ކުޅުންތެރިންވަނީ ޝަކުވާކޮށްފަ އެވެ.
އޮބަމަޔާން އާއި ލަކަޒެޓޭ ނުލައި ކުޅުނު އާސެނަލް މިމެޗުން ހިތިގޮތަކަށް ބަލިވިއިރު މެޗުގައި ބުރެންޓްފޯޑަށް ލީޑު ފުޅާކޮށްދިނީ މެޗުގެ 73 ވަނަ މިނެޓުގައި ކްރިސްޓިއަން ނޯގާޑެވެ.
މިމެޗުންވީ ބައްޔާއެކު އާސެނަލްގެ ކޯޗު މިކެލް އާޓެޓާ ވަނީ ހިތްހަމަނުޖެހުން ފާޅުކޮށްފަ އެވެ.
