ފަހަތުން އަރާ ބެލްޖިއަމް ބަލިކޮށް ފްރާންސް ފައިނަލަށް، ކުޅެން ޖެހޭނީ ސްޕެއިނާ ދެކޮޅަށް!

ޔޫއެފާ ނޭޝަންސް ލީގުގެ ސެމީ ފައިނަލުގައި ރޭ 3 - 2 ން ބެލްޖިއަމް ބަލިކޮށް އެންމެފަހުގެ ދުނިޔޭގެ ޗެމްޕިއަން ފްރާންސް ފައިނަލަށް ދަތުރުކޮށްފި އެވެ. ފައިނަލުގައި ފްރާންސް ނުކުންނަން ޖެހޭނީ އެންމެފަހުން ބޭއްވި ޔޫރޯގެ ޗެމްޕިއަން އިޓަލީ ކަޓުވާލައިގެން ފައިނަލަށް ދަތުރުކުރި ސްޕޭނާ އެވެ.

ބެލްޖިއަމަކީ މިވަގުތު ދުނިޔޭގެ ރޭންކިންގެ އެންމެ ކުރީގައި އޮތް ގައުމެވެ. ރޭގެ މެޗުގެ ފުރަތަމަ ހާފު ނިމުނުއިރު 2 - 0 ން ކުރީގައި ބެލްޖިއަމް އޮތް ނަމަވެސް ފްރާންސުން ވަނީ އާދަޔާހިލާފަށް މޮޅު ކުޅުމެއް ދައްކާ މުބާރާތުގެ ފައިނަލަށް ދަތުރުކޮށްފަ އެވެ.

އާދިއްތަ ދުވަހުގެރޭ ކުޅޭ ފައިނަލް މެޗުގައި ފްރާންސް ނުކުންނާނީ ސްޕެއިނާ ދެކޮޅަށެވެ. ހަމަ އެރޭ ކުޅޭ ތިން ވަނަ ހޮވާ މެޗުގައި ޔޫރޯގެ ޗެމްޕިއަން އިޓަލީ ބައްދަލުކުރާނީ ރޭންކިންގެ އެއްވަނައިގައި އޮތް ބެލްޖިއަމްއާ އެވެ.

ރޭ ކުޅުނު މެޗުގެ މެޗުގެ 37 ވަނަ މިނިޓްގައި ކެވިން ޑިބްރޭނާ ދިން ބޯޅައެއްގައި އޭރިއާތެރެއިން ޔަނިކް ކަރާސްކޯ ތިރިތިރިން ވަނީ ގޯލުގެ ކައިރީ ކަނަށް އަމާޒުކޮށްލައިގެން ބެލްޖިއަމަށް ލީޑު ނަގައިދީފަ އެވެ. އަދި އޭގެ 3 މިނެޓް ފަހުން ބެލްޖިއަމުން ވަނީ ރޮމެލޫ ލުކާކޫގެ ގޯލުން ލީޑު ފުޅާކޮށްފަ އެވެ.

ދެ ވަނަ ހާފްގައި ނުކުމެ ފްރާންސް އިން ނަތީޖާ އަނބުރާލީ ވަރަށް ހިތްވަރާއެކު ދެއްކި އާދަޔާހިލާފު މޮޅު ކުޅުމަކާއެކު އެވެ. ފްރާންސްގެ ފުރަތަމަ ގޯލު ޖެހީ ކަރިމް ބެންޒެމާ އެވެ. ކީލިއަން އެމްބާޕޭ ދިން ބޯޅައެއް ބެންޒެމާ ވަނީ ރަނގަޅަށް ހަމަޖެހިލާފައި ގޯލުގެ ތެރެއަށް ފޮނުވާލައިފަ އެވެ. އޭގެ ހަތްވަރަކަށް މިނެޓް ފަހުން އެމްބާޕޭ ވަނީ ޕެނަލްޓީ އަކުން ފްރާންސަށް މެޗުގެ ނަތީޖާ އެއްވަރުކޮށްދީފަ އެވެ. މިއީ އެންޓޮއިން ގްރީޒްމަން އަށް ބެލްޖިއަމްގެ ކުޅުންތެރިން ކުރި ފައުލަކާ ގުޅިގެން ދިން ޕެނަލްޓީއެކެވެ.

މެޗުގެ ނަތީޖާ ފްރާންސް ކޮޅަށް އެނބުރުނީ 90 ވަނަ މިނެޓްގައި ފްރާންސްގެ ފުލްބެކް ތިއޯ ހެނާންޑޭޒް ޖެހި ތަފާތު ގޯލާ އެކުގަ އެވެ. މިލަނޑާއެކު ފްރާންސް ފައިނަލުން ޖާގަ ޔަގީންކުރި އެވެ. ހެނާންޑޭޒް ފޮނުވާލި ބޯޅަ ސަލާމަތްކުރަން ކީފައު ކޯޓުއާއަށް ކުރެވުނު މާބޮޑު ކަމެއް ނެތެވެ.